'यावेळेस आम्ही काम करणारे, लोकांसाठी झटणारे उमेदवार देणार आहोत.'
सातारा : केवळ अडवाअडवी होत असल्याने लोकहितासाठी आम्ही मनोमिलन तोडले. सातारा नगरपालिकेच्या निवडणुकीत यावेळेस सातारा विकास आघाडीचे सर्व 50 नगरसेवक साताऱ्याची जनता निवडून देईल, असा विश्वास खासदार उदयनराजे भोसले (Udayanraje Bhosale) यांनी व्यक्त करत निवडणुकीचे रणशिंग फुंकले. दरम्यान, केवळ मिशीला पीळ व ताव मारून होत नसते, त्याला इकडे तिकडे फिरावे लागते, असा टोलाही त्यांनी नाव न घेता आमदार शिवेंद्रसिंहराजेंना (Shivendraraje Bhosale) लगावला.
सातारा नगरपालिकेच्या (Satara Municipal Election) नूतन इमारतीच्या कामाची पाहणी केल्यानंतर त्यांनी पत्रकारांशी संवाद साधला. उदयनराजे म्हणाले, ‘‘काहींनी आम्हाला मधल्या काळात मनोमिलन करून टाका, असे सांगितले. आम्ही ते मान्य करत मनोमिलन केले; पण पुढील पाच वर्षांत मनोमिलनाच्या काळात केवळ अडवाअडवी होऊ लागल्याने लोकांच्या हितासाठी मनोमिलन तोडले. त्यानंतरच्या निवडणुकीत साताऱ्याच्या इतिहासात नव्हे, तर महाराष्ट्राच्या इतिहासात लोकांनी त्यांच्याविरोधात कौल दिला. 40 पैकी एक अपक्ष, 38 जागा सातारा विकास आघाडीला आणि आमदारांच्या नगर विकास आघाडीचा एक नगरसेवक निवडून आला. आता यावेळेस आम्ही काम करणारे, लोकांसाठी झटणारे उमेदवार देणार आहोत. त्यामुळे सर्व 50 च्या 50 सातारा विकास आघाडीचे नगरसेवक साताऱ्याची जनता निवडून देईल.
नगर विकास आघाडीची एकही जागा निवडून येणार नाही. कारण लोक त्यांना स्वीकारणार नाहीत. निवडणुकीचा निकाल आताच लागला आहे. त्यांनी आता निवडणुकीला सामोरे यावे. मिशीला पीळ व ताव मारून होत नसते. इकडे तिकडे फिरावे लागते. हिंमत असेल तर समोरासमोर या.’’ आम्ही नगरसेवकपदापासून सुरुवात केली आहे. मी अलगद खासदार, आमदार झालेलो नाही. मागील वेळेस सर्वसामान्य उमेदवार पालिकेचा अध्यक्ष झाला, याचे कारण हेच आहे. लोकांना आता त्यांचा वीट आला आहे, अशी टीकाही त्यांनी नाव न घेता शिवेंद्रसिंहराजेंवर केली.
सातारा पालिकेत आम्ही पैसे खाल्ले असते, तर तुम्हीच सगळ्यांनी हेडलाइन केली असती; पण आम्ही कोणतेही गैर काम करत नाही. गैर खपवून घेत नाही. तसे असते तर राष्ट्रवादीचे सर्वेसर्वा यांनी मला ठेवले असते का, असा प्रश्न उपस्थित करून पाच रुपयांचा घोटाळा केला असता तर ते फोकस करून माझ्यावर आरोप केले असते, अशी टीकाही उदयनराजेंनी नाव न घेता शरद पवारांवर केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
