भारीच! कऱ्हाडात खडकातही फुलणार वृक्षांची लागवड, पक्ष्यांना ठरणार 'आधारवड'

कऱ्हाड (जि. सातारा) : नदीकाठावरील पक्ष्यांची आश्रयस्थान वाढवणाऱ्या वृक्षांच्या लागवडीसह नदीकाठावरील खडकातही पिंपळ लावून तेथील नैसर्गिक सौंदर्य समृद्ध करण्याचा उपक्रम येथे एनव्हायरो फ्रेंडस्‌ क्‍लब व पालिकेतर्फे हाती घेण्यात येणार आहे. कोरोनामुळे थंडावलेला वृक्ष संगोपन व संवर्धनाचाही उपक्रम हाती घेतला जाणार आहे. त्यासाठी प्रत्येक वॉर्डात किमान 100 वृक्षांची लागवड केली जाणार आहे. शहरातील नैसर्गिक तलावांचे स्त्रोतही सक्षम करण्यासाठी पावले उचलली जाणार आहेत.
 
स्वच्छ व हिरवेगार कऱ्हाड अंतर्गत हे उपक्रम हाती घेतले जाणार आहेत. शहरातील विविध मोकळ्या जागी पालिका वृक्ष लावणार आहेत. आतापर्यंत ईदगाह मैदान परिसरात किमान 100 झाडे लावण्यात आलेली आहेत. कोरोनामुळे त्यात खंड पडला होता. पुन्हा ती मोहीम अधिक गतीत येणार आहे. त्यात नदीकाठावरील पक्ष्यांची आश्रयस्थाने असलेली वृक्ष लावण्यात येणार आहे. त्यात पिंपळ, पिंपर्णी, लिंब काटेसावर आदी वृक्षांचा समावेश आहे. त्यामुळे अधिक नैसर्गिक वातावरण निर्मिती कायम राहणार आहे. त्यासाठी नदीकाठवरील पाहणी सुरू आहे. त्यासाठी वृक्ष प्राधिकरण समितीची बैठकही घेऊन आराखडा केला जाणार आहे. 

पक्ष्यांच्या किलबिलाटासाठी इस्लामपूरच्या शिक्षकाची धडपड

कऱ्हाडने स्वच्छ सर्वेक्षणात देशात पहिला क्रमांक मिळवला. त्यानंतर पालिकेने स्वच्छतेत सातत्य ठेवले आहे. कोरोनासारख्या महामारीतही पालिका सतर्क होती. शहरातील मोकळ्या जागेत वृक्षारोपण करण्याचे पालिकेचे उद्दिष्ट आहे. त्यासाठी पालिकेने त्याचा सर्व्हेही केला. त्यानुसार एका प्रभागात किमान 100 वृक्ष लावले जाणार आहेत. त्यानुसार किमान तीन हजार वृक्ष लावण्याचे उद्दिष्ट आहे. किमान तीन वर्षांचे वृक्ष लावले जातील. त्याच्या वाढीचा वेग जास्त असतो. त्याची वाढही होताना देखभालीची जबाबदारी स्थानिकांवर आहे. त्यानुसार जागा निवडल्या गेल्या आहेत. त्यात इदगाह मैदानात 100 झाडे लावली आहेत. शहरातील अन्य मोकळा जागी आता हिरवीगार होणार आहे.

सह्याद्री व्याघ्र प्रकल्पात पक्षी निरीक्षणाची संधी 

अशी होणार ग्रीनरी 

• नदीकाठावरील पक्ष्यांसाठी लावले जाणार मोठे वृक्ष 
• नदीकाठावरील खडकात बहरणार पिंपळ 
• शहरातील नैसर्गिक तलावांचे होणार पुनरुज्जीवन 
• प्रत्येक वॉर्डातील मोकळ्या जागेत होणार वृक्षारोपण 
• स्थानिक नगरसेवकांसह नागरिकांचाही पुढाकार 

संपादन : बाळकृष्ण मधाळे