सातारा : कारने धडक दिल्याने भिवडीच्या शिक्षकाचा मृत्यू

सातारा : मोळाचा ओढा येथे आज सकाळी मॉर्निंग वॉकसाठी निघालेल्या दोघांना कारने धडक दिली. यामध्ये एका शिक्षकाचा जागीच मृत्यू झाला, तर एक जण जखमी झाले आहेत.

अनिल रामचंद्र दरेकर (मूळ रा. भिवडी, जा. जावळी) असे मृत शिक्षकाचे नाव आहे, तर दशरथ फरांदे (पूर्ण नाव नाही. रा. सैदापूर, सातारा) असे जखमी व्यक्तीचे नाव आहे. जखमीवर येथील जिल्हा रुग्णालयात उपचार सुरू आहेत.

तामजाईनगरमधील शिक्षक अनिल दरेकर हे दररोज सकाळी फिरण्यासाठी जात होते. आज सकाळीही ते नेहमीप्रमाणे फिरण्यासाठी घरातून बाहेर पडले होते. पहाटे सहाच्या सुमारास मोळाचा ओढा परिसरातील रस्त्याने जात होते. या वेळी त्यांच्याबरोबर अन्य काही जण होते. मोळाचा ओढा-सैदापूर रस्त्याने जात असताना पाठीमागून आलेल्या भरधाव कारने चालणाऱ्यांपैकी दोघांना धडक दिली. त्यानंतर जागेवर न थांबता वाहनचालक जोरात वाहन घेऊन पळून गेला.

नागरिकांनी जखमींना तातडीने उपचारासाठी जिल्हा रुग्णालयात दाखल केले. त्यानंतर अपघाताची माहिती पोलिस व अनिल यांच्या नातेवाइकांना दिली. त्यानंतर नातेवाइक अपघातस्थळी आले. अपघातात अनिल यांच्या डोक्याला गंभीर दुखापत झाली होती, तर दशरथ यांच्या पायाला लागले आहे. अनिल यांचा उपचारापूर्वीच मृत्यू झाल्याचे वैद्यकीय अधिकाऱ्यांनी सांगितले. फरांदे यांच्यावर उपचार सुरू आहेत. अपघाताबाबत मनोज परशुराम इंगवले (रा. किडगाव, ता. सातारा) यांनी तालुका पोलिस ठाण्यात फिर्याद दिली आहे. त्यानुसार अनोळखी वाहनचालकावर गुन्हा नोंद झाला आहे.