पोलिस ठाण्‍यातच युवतीने स्वतःच्या गळ्यावर काचेने केले वार

भुईंज (जि. सातारा) : वाई येथील युवकावर झालेल्या खुनी हल्‍ल्याबाबत पोलिसांनी चौकशीसाठी बोलावलेल्या युवतीने पोलिस ठाण्याच्या स्वच्छतागृहात शनिवारी (ता. २६) दुपारी आत्महत्‍येचा प्रयत्न केला. याप्रकरणी पोलिसांनी तिच्यावर गुन्हा दाखल केला आहे. (satara-crime-news-girl-tried-to-beat-herself-in-bhuinj-police-station)

पोलिसांनी दिलेली माहिती अशी, की दोन दिवसांपूर्वी वाई येथील युवकावर असले येथील हणमंत किसन कणसे यांच्या घरात अज्ञात तिघांनी दांडक्याने व धारदार शस्त्राने वार करून गंभीर जखमी केले. तिघे मारेकरी तेथे येऊन युवकास मारहाण करीत असताना संबंधित युवती व तिचे वडील हणमंत कणसे तेथे टीव्ही पाहात होते. त्यामुळे या युवतीला व तिच्या वडिलांना चौकशीसाठी पोलिसांनी बोलावले होते.

त्यावेळी त्या युवतीस पोलिस महिला विश्रामगृहात चौकशीसाठी नेले. चौकशी चालू असताना युवती स्वच्छतागृहात गेली. तेथील खि़डकीची काच फोडून गळा चिरून आत्महत्या करण्याचा तिने प्रयत्न केला. त्यावेळी तेथे उपस्थित असलेल्या महिला पोलिस कर्मचाऱ्यांनी प्रसंगावधान राखून तिला पकडून उपचार केले. तिच्या गळ्याला आठ टाके पडले असून तिला रुग्णालयातून उपचारानंतर सो़डण्यात आले.

तिला रविवारी पुन्हा तपासासाठी बोलविण्यात आले. तिच्यावर पोलिस ठाण्यात आत्महत्‍येचा प्रयत्न केल्याबद्दल गुन्हा दाखल करण्यात आला आहे. सहायक पोलिस निरीक्षक रत्नदीप भंडारी तपास करीत आहेत.