माण तालुका हादरला! शेतात पिकांना पाणी देण्यासाठी गेलेल्या दाम्पत्याचा निर्घृण खून; डोके, मान, गळ्यावर धारदार शस्त्राने वार

दहिवडी : संजय रामचंद्र पवार (वय ४९ वर्षे) व मनिषा संजय पवार (वय ४५ वर्षे) या दाम्पत्याचा अज्ञाताने धारदार शस्त्राने वार करुन खून केल्याची भयंकर घटना आंधळी (ता. माण) येथे घडली आहे.

संजय व मनिषा हे दाम्पत्य येथील पवार दरा येथे शेतात पिकाला पाणी देण्यासाठी शनिवारी रात्री दहानंतर विद्युत पंप सुरु करण्यास आले होते. रात्री साधारण दहा ते अकराच्या दरम्यान अज्ञाताने धारदार शस्त्राने डोक्यावर, मानेवर, गळ्यावर वार करून या दाम्पत्याची निर्घृण हत्या केली.

सकाळी या परिसरातील शेतकरी शेतात जात असताना रक्ताळलेल्या अवस्थेत पडलेले मृतदेह आढळून आले. त्यानंतर सदरची माहिती पोलिस पाटील यांना देण्यात आली. पोलिस पाटीलांनी ही माहिती दहिवडी पोलिस (Dahiwadi Police) ठाण्याचे सहाय्यक पोलिस निरीक्षक अक्षय सोनवणे यांना दिल्यानंतर पोलिस पथक घटनास्थळी दाखल झाले. सदर घटनेबाबत दबक्या आवाजात उलटसुलट चर्चा सुरु असून लवकरच आरोपी हाती लागण्याची शक्यता वर्तविण्यात येत आहे.