पैशाच्या हव्यासापोटी लग्नाच्या बेडीऐवजी पोलिस कोठडीची जोडी

सातारा : कचरा वाहतुकीच्या घंटागाड्यांच्या टेंडरपोटी नगरपालिकेकडे असलेले 15 लाख रुपये परत देण्यासाठी दोन लाख 30 हजार रुपयांची लाच स्वीकारल्याप्रकरणी अटकेत असलेल्या सातारा पालिकेचे उपमुख्याधिकारी संचित धुमाळ यांच्यासह तिघांना तीन दिवस पोलिस कोठडीत ठेवण्याचे आदेश आज न्यायालयाने दिले आहेत. 

लाचलुचपत प्रतिबंधक विभागाने काल सातारा पालिकेत कारवाई केली. संबंधित तक्रारदार हा घंटागाडीचा ठेकेदार होता. सातारा पालिकेचे घंटागाडी टेंडरमधील 15 लाख रुपये अनामत रक्कम म्हणून पालिकेकडे होते. ते पैसे मिळण्यासाठी तक्रारदाराने मागणी केली होती. हे पैसे देण्यासाठी संचित कृष्णा धुमाळ (वय 33, सध्या रा. केसरकर पेठ, मूळ जोगवडी, ता. भोर) यांनी दोन लाख 30 हजार रुपयांची मागणी केली होती. त्याबाबत तक्रारादाने एलसीबीकडे तक्रार केली. त्यानुसार केलेल्या पडताळणीमध्ये लाचेची मागणी केल्याचे स्पष्ट झाले. त्यानंतर आज दुपारी सातारा पालिकेत सापळा लावला होता. त्यामध्ये दोन लाख 30 हजार रुपयांची लाच स्वीकारताना संचितला अटक करण्यात आली. 

धुमाळ याच्याबरोबर या गुन्ह्यामध्ये पालिकेचे आरोग्य निरीक्षक प्रवीण एकनाथ यादव (वय 51, रा. करंजे पेठ, सातारा) व गणेश दत्तात्रय टोपे (वय 43, रा. यादोगोपाळ पेठ, सातारा) यांनाही अटक करण्यात आली होती. तिसरे आरोग्य निरीक्षक राजेंद्र कायंगुडे (रा. एसटी कॉलनीचे मागे, गोडोली, सातारा) यांच्यावरही या प्रकरणी गुन्हा दाखल करण्यात आला आहे. मात्र, गुन्हा दाखल झाल्यापासून ते पसार आहेत. ते लाचलुचपत प्रतिबंधक विभागाच्या ताब्यात सापडलेले नाहीत.

काल अटक केलेल्या धुमाळसह दोन आरोग्य निरीक्षकांना लाचलुचपत प्रतिबंधक विभागाने आज दुपारी न्यायायात हजर केले. दोन्ही बाजूचे म्हणणे ऐकुण घेतल्यानंतर न्यायालयाने तिघांना तीन दिवस पोलिस कोठडीत ठेवण्याचे आदेश न्यायालयाने दिले आहेत. न्यायालयाने दिलेल्या या संधीचा फायदा घेत लाचलुचपत विभागाने या भ्रष्टाचारत हिस्सेदार असणाऱ्या आणखि संशीतांचा भांडाफोड करावा अशी सातारकरांची अपेक्षा आहे. दरम्यान, यातील उपमुख्याधिकारी संचित धुमाळ याचा साखरपुडा झाला होता. मे महिन्यात त्याचे लग्न होणार होते. कोरोना संसर्गामुळे ते पुढे ढकलावे लागले. मात्र, पैशाच्या हव्यासामुळे लग्नाआधिच त्याला पोलिस कोठडीची हवा खावी लागली आहे.

कोरोनाच्या भयातही सातारकरांच्या विदेशीवर उड्या 

काळकोठडीतील दुराव्याला मिळाला दोन महिन्यांनी आधार