पावसाची उघडीप... भात पेरणीची लगबग

चाफळ (जि. सातारा) ः पाटण तालुक्‍यातील चाफळसह परिसरात गेल्या दोन दिवसांत पडलेला पाऊस हा खरीप हंगामातील पेरणीसाठी उपयुक्त असल्याचे शेतकऱ्यांमधून बोलले जात असून, काही ठिकाणी भात पेरणी व भाताचे तरवे टाकण्यास सुरुवात झाली आहे. वेळेत पाऊस सुरू झाल्याने शेतकरी आनंदी आहे. 

जाळगेवडी, माथणेवाडी, जाधववाडी, माजगाव, नाणेगाव, कडववाडी, डेरवण, वाघजाईवाडी, शिंगणवाडी या बागायती पट्ट्यात मुख्यत्वे भात पिकाची धूळवाफ पेरणी केली जाते. काही ठिकाणी वळवाने जोरदार, तर काही ठिकाणी तुरळक हजेरी लावली. त्यामुळे आंतर मशागतीची कामे कमी अधिक प्रमाणात झाली. मात्र, गेल्या दोन महिन्यांपासून कोरोनाच्या संसर्गाने संचारबंदी असल्याने या काळात शेतातील मशागतीच्या कामांना वेग आला. वेळ मिळेल त्यानुसार शेताची नांगरट, कुळवणी, फणपाळी आदी आंतरमशागतीची कामे शेतकऱ्यांनी उरकली. त्यामुळे यावेळचा खरीप हंगाम वेळेत सुरू होईल, असे चित्र आहे. 

पाटण तालुक्‍यातील चाफळसह भागातील डोंगरमाथ्यावर भातशेतीस प्राधान्य आहे. लागण पद्धतीने भात लागवड सर्रास केली जाते. त्यात "इंद्रायणी', "मेनका', "सगुना', "पार्वती', "पुसा बासुमती", "आर 24' आदी संकरित वाणांचा उपयोग केला जातो. काही ठिकाणी अजूनही पारंपरिक "कोल्हापुरी खडव', "आजरा घनसाळ', "तांबुडकी' वाणाचा वापर केला जातो. सोयाबीन व भुईमुगाच्या असंख्य जाती बाजारात उपलब्ध आहेत, पण संचारबंदीची कडक अंमलबजवणी होत असल्याने नवीन संकरित बी-बियाणे, खते मिळतील का, याबाबत साशंकता आहे. वाहने बंद असल्याने शेतकरी वर्गाला बियाणे, खते घेऊन जाताना अडचणी निर्माण होत आहेत. 

बाजारपेठेत विशिष्ट बियाण्यांचा तुटवडा 
सध्या चाफळ येथील बियाणांच्या दुकानात सर्व प्रकारचे बियाणे उपलब्ध नसल्याने शेतकऱ्यांची बियाणे मिळवण्यासाठी धांदल उडाल्याची दिसून येत आहे. कृषी विभागाने चाफळच्या बाजारपेठेत तातडीने सर्व प्रकारच्या बियाण्यांची उपलब्धता करावी, अशी मागणी शेतकरी करत आहेत. गेल्या दोन महिन्यांपासून संपूर्ण रोजगार बंद असल्याने काही शेतकरी वर्गाकडे बियाणे घेण्यासाठी पैसे नसल्याने बियाणे घेताना अनेक अडचणींना त्यांना तोंड द्यावे लागत आहे. 

रयत शिक्षण संस्थेच्या सचिवपदासाठी ही नावे चर्चेत; 27 जूनला निवड