सातारा : जिल्ह्यातील बहुतांश भागात आज अवकाळी पावसाने झोडपले. पहाटे व दुपारनंतर सोसाट्याच्या वाऱ्यासह झालेल्या पावसाने रब्बी हंगामातील पिकांसह भाजीपाल्याचे मोठ्या प्रमाणात नुकसान झाले. मोळमध्ये (ता. खटाव) दुपारनंतर गारांच्या वर्षावात ढगफुटीसदृश पाऊस झाला. मोळमधील काही भागात गारांचा खच पडला होता.
जिल्ह्यात गेल्या दोन दिवसांपासून ढगाळ वातावरण आहे. काल सायंकाळनंतर काही ठिकाणी हलक्या स्वरूपाचा पाऊस झाला. रात्री नऊ वाजण्याच्या सुमारास सातारा शहर व परिसरात सुमारे अर्धा तास मुसळधार पाऊस झाला. आज पहाटे काही ठिकाणी मुसळधार व हलक्या स्वरूपाचा पाऊस झाला. त्यानंतर दुपारी दोनपासून अवकाळी पावसाचा तडाखा बसला. मोळमध्ये तर ढगफुटीसदृश पाऊस पडला. शेतात, रस्त्यावर, अंगणात गारांचा खच पडला होता. अन्य भागातही मुसळधार पाऊस झाला. शिवथर परिसरात शेतात पाणी साचले होते.
सोसाट्याच्या वाऱ्यासह झालेल्या या पावसाने रब्बी हंगामातील पिकांचे अतोनात नुकसान झाले. ज्वारी, हरभरा, गहू, मका, कांदा, बटाटा आदी पिकांचा त्यात समावेश आहे. त्याशिवाय जावळी व महाबळेश्वर तालुक्यात स्ट्रॉबेरीची मोठ्या प्रमाणात हानी झाली. खटाव, माण तालुक्यात कांदा व बटाट्याची काढणी सुरू आहे. शिवारात काढून ठेवलेले पीक प्लॅस्टिकच्या कागदाने झाकण्यासाठी शेतकऱ्यांची धांदल उडाली. ज्वारी, गव्हाची मळणी सुरू आहे.
अनेक शेतकऱ्यांचा कांदा, बटाटा, ज्वारी, गहू ही पिके शेतातच काढून ठेवल्याने ती भिजली. सोसाट्याच्या वाऱ्याने माण, खटाव तालुक्यांत ठिकठिकाणी ज्वारी, गहू व मका जमीनदोस्त झाली. त्याशिवाय कलिंगड, काकडी व भाजीपाल्याचेही नुकसान झाले. रब्बी हंगामाच्या तोंडावरच हा पाऊस झाल्याने पिकांचे नुकसान होऊन शेतकऱ्यांना मोठा आर्थिक फटका बसणार आहे. पावसाने आंब्याचा मोहर जमिनीवर पडला, तर द्राक्षांचेही नुकसान झाले आहे. सध्या जिल्ह्यात कारखान्यांचा गळीत हंगाम सुरू आहे. त्यासाठी शिवारांत जोरात ऊसतोडणी सुरू आहे. मात्र, या पावसाने ऊसतोडणी थांबली आहे. पावसाने उघडीप देईपर्यंत ऊसतोड करता येणार नाही.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
