दाेन युवकांच्या आत्महत्येने सातारकरांना धक्का

सातारा : येथील यादोगोपाळ पेठेतील युवकाने बेरोजगारीला कंटाळून आज आत्महत्या केली आहे. ऋषिकेश दत्तात्रय गहिने (वय 23, रा. रमाकांत टॉवर, सातारा) असे मृत युवकाचे नाव आहे.
 
पोलिसांनी दिलेल्या माहितीनुसार, ऋषिकेशच्या आजोबांचे यादोगोपाळ पेठेत इस्त्रीचे दुकान आहे. या दुकानामध्ये तो आजोबांना मदत करत होता. सध्या लॉकडाउन असल्यामुळे तो इतरत्र नोकरीही शोधत होता; परंतु त्याला नोकरी मिळत नव्हती. त्यामुळे त्याला नैराश्‍य आले होते. त्याची आई एका ठिकाणी वृद्ध लोकांना सांभाळण्याचे काम करते. काही वेळा आईला त्यांच्याच घरी राहावे लागते. सध्या आजोबा पुण्याला गेले आहेत. त्यामुळे ऋषिकेश घरी एकटाच होता.
 
शुक्रवारी (ता. 12) रात्री त्याने घरात गळफास घेऊन आत्महत्या केली. काल (ता. 13) आईने त्याला फोन केला. मात्र, त्याचा फोन बंद लागला. बॅटरी खराब झाली असेल, असे समजून आईने दुर्लक्ष केले. आज सकाळी तिने पुन्हा फोन केला. त्या वेळीही तो बंद लागला. त्यामुळे आईने नगरसेवक धनंजय जांभळे यांना माहिती दिली. जांभळेंनी पेठेतील काही मुलांना घेऊन ऋषिकेशचे घर गाठले. सर्व मुलांनी मिळून दरवाजा उघडला. त्या वेळी घरातून दुर्गंधी आल्याने युवक तेथून बाजूला झाले. याबाबत माहिती मिळाल्यानंतर शाहूपुरी पोलिस तेथे पोचले. याबाबत रात्री उशिरापर्यंत शाहूपुरी पोलिस ठाण्यात नोंद झाली नव्हती.

का करावं लागतं हे सारं?

दरम्यान फत्यापूर (ता. सातारा) येथील युवकानेही महामार्गालगतच्या वळसे गावानजीकच्या डोंगरात गळफास घेऊन आत्महत्या केली. आज (रविवार) सायंकाळी ही घटना उघडकीस आली.

पोलिसांकडून मिळालेल्या माहितीनुसार, विशाल विजयसिंह घाडगे (वय 30) असे आत्महत्या केलेल्या युवकाचे नाव आहे. वळसे गावातून डोंगरातून 'बीव्हीजी' फूड पार्ककडे जाणाऱ्या रस्त्यालगत असलेल्या महादेवाच्या डोंगर परिसरात ही घटना घडली.वनविभागाच्या हद्दीत झाडाला नायलॉनच्या दोरीने गळफास घेऊन विशाल याने आत्महत्या केली. आत्महत्येचे कारण समजू शकले नाही. घटनेची नोंद बोरगाव पोलिस ठाण्यात झाली असून हवालदार प्रशांत महाडिक पुढील तपास करत आहेत.

आत्महत्या हाच शेवटचा पर्याय असतो का?

कऱ्हाडमध्ये खासगी सावकारावर गुन्हा
 
दहावीनंतर काय? विनामुल्य वेबिनारचे आयोजन