प्रवीण जाधव
सातारा : साताऱ्यात आयटी पार्क सुरू करण्यासाठी नागेवाडी (ता. सातारा) येथील ४२ हेक्टर जमीन देण्याबाबतचा निर्णय उद्योगमंत्री उदय सामंत, सार्वजनिक बांधकाममंत्री शिवेंद्रसिंहराजे भोसले व जिल्हाधिकारी संतोष पाटील यांच्या एकत्रित झालेल्या बैठकीमध्ये झाला आहे. त्यानुसार औद्योगिक विकास महामंडळाने प्रक्रिया सुरू केली आहे. त्यामुळे जिल्ह्यात आयटी पार्क सुरू होण्याच्या गेल्या अनेक वर्षांपासूनच्या उच्चशिक्षित युवक व त्यांच्या पालकांच्या अपेक्षेला मूर्त स्वरूप येण्यास सुरुवात झाली आहे. सातारकरांची ही अपेक्षा लवकरात लवकर पूर्ण होण्यासाठी उद्योगमंत्री व लोकप्रतिनिधींनी युद्धपातळीवर प्रयत्न करावे, अशी जिल्ह्यातील नागरिकांची अपेक्षा आहे.