दहावीतील विद्यार्थ्यावर अत्याचार केल्याप्रकरणी शाळेच्या लिपिकाला दहा वर्षे सक्तमजुरी

सातारा : दहावीतील विद्यार्थ्याला अश्लील व्हिडिओ दाखवून ब्लॅकमेल करत त्याच्यावर अनैसर्गिक अत्याचार केल्याप्रकरणी शाळेच्या लिपिकाला विशेष जिल्हा व सत्र न्यायाधीश ए. के. पटणी यांनी दहा वर्षे सक्तमजुरीची शिक्षा ठोठावली आहे. रामदास पोपट गाडे (वय ३३) असे शिक्षा मिळालेल्या लिपिकाचे नाव आहे. ऑगस्ट २०१६ ते आॅक्टोबर २०१७ या कालावधीत ही घटना घडली.

याबाबत पीडित मुलाने तक्रार दिली होती. लिपिक गाडे याने अधिकाराचा गैरवापर करत पीडित विद्यार्थ्याला काम आहे, असे म्हणून बोलावून घेतले. ‘तू जर माझ्याबरोबर आला नाहीस तर तुला नापास करेन, तसेच तुझे शाळेतील मुलीशी प्रेमसंबंध आहेत, अशी तुझी बदनामी करीन’ अशी धमकी त्याने त्याला दिली होती. बदनामी होईल, या भीतीने पीडित विद्यार्थी गाडे सांगेल तसे करू लागला. त्याचाच गैरफायदा घेत गाडेने त्याला वेळोवेळी एका बंगल्यात नेले.

तेथे मोबाईलमधील अश्लील व्हिडिओ दाखवून त्याच्यावर अनैसर्गिक अत्याचार केले. वर्षभर वेळोवेळी अत्याचार झाल्याने तो घाबरून गेला होता. पीडित विद्यार्थी फारसा कोणाशी बोलत नव्हता. त्रास जास्त होऊ लागल्याने त्याने या प्रकाराची माहिती कुटुंबीयांना दिली. त्यानंतर कुटुंबीयांनी मुलाला घेऊन पोलिस ठाण्यात फिर्याद दिली. तत्कालीन पोलिस निरीक्षक विनायक वेताळ यांनी तपास करून जिल्हा न्यायालयात दोषारोपपत्र दाखल केले होते. खटल्याच्या सुनावणीदरम्यान सहा साक्षीदार तपासण्यात आले. साक्षीदारांच्या साक्षी व जिल्हा सरकारी वकील महेश कुलकर्णी व सहायक सरकारी वकील नितीन मुके यांचा युक्तिवाद ग्राह्य मानून न्यायाधीश पटणी यांनी गाडे याला शिक्षा ठोठावली. सरकारी वकिलांना पोलिस प्रॉसिक्युशन स्कॉडच्या पथकाने मदत केली.