Ajinkyatara Fort : शिराळ्यातील मुलाची अजिंक्यतारा किल्ल्यावरून उडी मारून आत्महत्या; कुरणेश्वर मंदिराजवळ आढळला मृतदेह

सातारा : शिराळा तालुक्यातील एका अल्पवयीन मुलाने अजिंक्यतारा किल्ल्यावरून उडी मारून आत्महत्या केली. याबाबत कऱ्हाड तालुका पोलिस (Karad Police) ठाण्यात नोंद आहे.

पोलिसांनी दिलेली माहिती अशी : संबंधित मुलगा सातारा जिल्ह्यातील एका महाविद्यालयात शिक्षण घेत होता. तो रहात असलेल्या ठिकाणी रविवार सकाळी आठपासून आढळून आला नाही. तो रात्री आठपर्यंत न दिसल्याने संबंधितांनी त्यांच्या कुटुंबीयांशी संपर्क साधत तो गावी आला आहे का, अशी विचारणा केली.

तो गावी आला नसल्याने कुटुंबीय तातडीने कऱ्हाडला आले. शोध घेऊनही तो सापडला नाही, तसेच तो फोनही उचलत नव्हता. त्यामुळे रात्री अकराच्या सुमारास कुटुंबीयांनी त्याचे अपहरण झाल्याबाबत कऱ्हाड शहर पोलिस ठाण्यात फिर्याद नोंदविली. त्यानंतर पोलिसांनी त्याचा शोध सुरू केला. पोलिसांनी तातडीने त्याच्या फोनचे लोकेशन शोधले. ते अजिंक्यतारा किल्ल्यावर दाखवत होते.

त्यानुसार रविवारी रात्रीच पोलिस त्या परिसरात आले होते. त्यांनी शोध घेतला; परंतु मुलगा आढळून आला नाही. आज सकाळी पुन्हा शोध सुरू करण्यात आला. त्या वेळी त्याचा मृतदेह किल्ल्याच्या कुरणेश्वर मंदिराच्या बाजूला आढळून आला. तो शवविच्छेदनासाठी जिल्हा रुग्णालयात आणण्यात आला होता. त्याच्या आत्महत्येचे कारण समजू शकलेले नाही. याबाबत तालुका पोलिस ठाण्यात नोंद झाली आहे.