ग्रामीण भागात कहर! टाकेवाडीला कोरोनाचा घट्ट विळखा, प्रशासन सतर्क | Sakal
sakal

बोलून बातमी शोधा

Takewadi village hotspot

माणमधील कोरोनाबाधितांची आजपर्यंतची संख्या १२,२९० इतकी असली तरी ११,६८५ जणांनी कोरोनावर यशस्वीपणे मात केली आहे.

ग्रामीण भागात कहर! टाकेवाडीला कोरोनाचा घट्ट विळखा

दहिवडी (सातारा) : माणमधील कोरोनाबाधितांचा (corona patient) आकडा नियंत्रणात आणण्यात प्रशासनाला यश आले आहे. मात्र, टाकेवाडी हॉटस्पॉट (Takewadi village hotspot) बनल्याने प्रशासन सतर्क झाले आहे. दहिवडी, म्हसवड या शहरांतील कोरोनाबाधितांची संख्या अत्यंत कमी झाली आहे. पण, अधूनमधून अचानकच वाढणारे रुग्ण पाहता सर्वांनी सावधगिरी बाळगण्याची आवश्यकता आहे. (Takewadi Village In Satara District Became The Corona Hotspot Center Satara Marathi News)

माणमधील कोरोनाबाधितांची आजपर्यंतची संख्या १२,२९० इतकी असली तरी ११,६८५ जणांनी कोरोनावर यशस्वीपणे मात केली आहे. दुर्दैवाने ३१६ जणांचा कोविड-१९ ने बळी घेतला आहे. हे आकडे मोठे असले तरी आजअखेर फक्त २८९ कोरोनाबाधित रुग्ण उपचाराखाली आहेत आणि ही संख्या प्रशासनासह जनतेला दिलासा देणारी आहे. एकीकडे रुग्णसंख्या घटत असताना सतोबाच्या पायथ्याला डोंगरदऱ्यात वसलेल्या टाकेवाडी गाव मात्र हॉटस्पॉट बनू लागले आहे. तालुक्यातील २८९ पैकी फक्त टाकेवाडीत ४५ कोरोनाबाधित आहेत. लक्षणे दिसून सुध्दा तसेच कोरोनाबाधितांच्या संपर्कात आलो आहोत, हे माहीत असूनसुध्दा कोरोना चाचणी करण्यास केलेली टाळाटाळ यास कारणीभूत आहे. अचानक वाढलेली कोरोनाबाधितांची संख्या पाहून प्रशासन हबकले होते. मात्र, त्यानंतर मलवडी प्राथमिक आरोग्य केंद्रातील (Malwadi Primary Health Center) वैद्यकीय अधिकारी (Medical officer), कर्मचारी, अंगणवाडी व आशा सेविका, ग्रामपंचायत प्रशासन (Gram Panchayat) यांनी एकत्रित प्रयत्न करून गावात जागृती केली. त्यामुळे आगामी काही दिवसांत ही रुग्णसंख्या आटोक्यात येण्याची शक्यता आहे.

दहिवडीत २७, तर म्हसवडमध्ये फक्त १४ कोरोनाबाधित उपचाराखाली आहेत. यासोबतच पळशी २९, गोंदवले बुद्रुक १६, मोही १६, कुळकजाई १३ व बोडके ११ याच ठिकाणी दोन अंकी कोरोनाबाधित आहेत. तर ३५ गावांत एक आकडी कोरोनाबाधित आहेत. उर्वरित तब्बल ५३ गावांत एकही कोरोनाबाधित नाही. हॉटस्पॉट बनलेल्या लोधवडे, नरवणे, राजवडी व भालवडी या गावांनी कोरोनावर मात करण्यात यश मिळवले आहे. सध्या ही सर्व दिलासादायक परिस्थिती असली तरी टाकेवाडीचे उदाहरण बघता व तज्‍ज्ञांच्या अंदाजानुसार संभाव्य तिसऱ्या लाटेचा धोका पाहता सावधगिरी बाळगण्याची अत्यंत आवश्यकता आहे. प्रशासनाने थोडी ढिलाई दिल्यानंतर जनतेची वागण्याची बेफिकिरी धोकादायक ठरू शकते.

"सामान्य जनतेला आमचे आवाहन आहे की, त्यांनी प्रशासनाच्या आदेशाचे पालन करावे. जनतेने आजपर्यंत प्रशासनाला चांगले सहकार्य केले आहे. अजून काही दिवस सहकार्य करा. कोणावरही कारवाई करण्याची वेळ येऊ नये, अशी आमची अपेक्षा आहे."

-बाई माने, तहसीलदार, माण

Takewadi Village In Satara District Became The Corona Hotspot Center Satara Marathi News