AI Threat : एआयमुळे मानवाचं अस्तित्त्व संपणार? कंपन्या तुम्हाला ठेवताहेत धोक्यात; 'या' पत्रातून झालाय धक्कादायक खुलासा

Artificial Intelligence : कृत्रिम बुद्धिमत्ता (AI) ही मानवजातीसाठी मोठं धोकादायक ठरू शकते, असा इशारा गुगलच्या DeepMind, OpenAI आणि Anthropic या कंपन्यांच्या माजी कर्मचाऱ्यांनी एका संयुक्त पत्रात दिला आहे. या पत्रात आर्टिफिशियल न्यूरल नेटवर्क्स आणि डीप लर्निंगवर काम करणारे प्रसिद्ध संगणिक शास्त्रज्ञ डॉ. योशुआ बेंगियो, ‘आर्टिफिशियल इंटेलिजेंसचा जनक’ म्हणून ओळखले जाणारे डॉ. जेफ्री हिंटन आणि ब्रिटिश संगणिक शास्त्रज्ञ स्टुअर्ट रसेल यांचेही समर्थन आहे.

हे माजी कर्मचारी आपल्या पत्रात म्हणतात की, कृत्रिम बुद्धिमत्ता माहितीचा चुकीचा प्रसार करू शकते, समाजातील असमानता वाढवू शकते आणि अगदी स्वायत्त शस्त्रास्त्र प्रणाली बनवू शकते, ज्यामुळे मानवी जीवनच धोक्यात येऊ शकते. या धोकादायक परिस्थितीकडे जागतिक स्तरावर कृत्रिम बुद्धिमत्ता क्षेत्रातील कंपन्या आणि सरकारांनी डोळेझाक करता येणार नाही, असेही त्यांनी स्पष्ट केले आहे.

या पत्रात नमूद केल्याप्रमाणे, कृत्रिम बुद्धिमत्ता विकसित करणाऱ्या कंपन्यांकडे त्यांच्या सिस्टम्सच्या क्षमता आणि मर्यादांबद्दल बरीच गुप्त माहिती आहे. ही माहिती ते स्वेच्छेने लोकांशी शेअर करत नाहीत असा आरोपही या पत्रात करण्यात आला आहे. तसेच, या कंपन्यांवर कोणतेही सरकारी नियंत्रण नसल्यामुळे, त्यांच्या बोर्डाच्या गोपनीयतेच्या करारांमुळे ही माहिती बाहेर येऊ शकत नाही, असेही या माजी कर्मचाऱ्यांनी म्हटले आहे.

या संशोधनाशी संबंधित धोकादायक बाबींबद्दल सार्वजनिकरित्या बोलण्यासाठी सरकारकडून कोणतीही संरक्षण व्यवस्था नसल्याने आणि कंपन्यांकडून कारवाई होण्याची भीती असल्याने आम्ही याबद्दल बोलत नसल्याचेही या पत्रात नमूद करण्यात आले आहे.

या माजी कर्मचाऱ्यांच्या चिंतांना कृत्रिम बुद्धिमत्ता क्षेत्रातील आघाडीच्या व्यक्तींनी सपोर्ट केला आहे. यावरून कृत्रिम बुद्धिमत्तेच्या विकासाकडे आणि वापराकडे गांभीर्याने लक्ष देण्याची गरज निर्माण झाली आहे. कृत्रिम बुद्धिमत्तेच्या वाढत्या क्षमतेमुळे हे तंत्रज्ञान जबाबदारीने आणि सुरक्षितपणे विकसित करणे आणि वापरणे आवश्यक आहे.