M.R Srinivasan : विज्ञान क्षेत्रात मोठी पोकळी! अणुशास्त्रज्ञ एम.आर श्रीनिवासन यांचे निधन, होमी भाभांसोबत केले होते काम

M.R Srinivasan Update : भारताच्या अणुऊर्जा क्षेत्रातील ख्यातनाम शास्त्रज्ञ आणि अणुऊर्जा आयोगाचे माजी अध्यक्ष डॉ. एम. आर. श्रीनिवासन यांचे मंगळवारी निधन झाले. ते ९५ वर्षांचे होते. त्यांच्या पश्चात पत्नी आणि एक मुलगी असा परिवार आहे. चेन्नईमध्ये त्यांच्यावर अंत्यसंस्कार झाले असून, जिल्हाधिकारी लक्ष्मी भाव्या तन्नीरु यांनी त्यांच्या पार्थिवावर पुष्पांजली अर्पण करून श्रद्धांजली वाहिली.

अणुऊर्जा आयोगाचे अध्यक्ष आणि NPCIL चे संस्थापक अध्यक्ष

डॉ. श्रीनिवासन हे भारताच्या स्वदेशी अणुऊर्जा कार्यक्रमाचे शिल्पकार मानले जातात. त्यांनी डॉ. होमी जहांगीर भाभा यांच्या मार्गदर्शनाखाली अनेक महत्त्वाचे प्रकल्प यशस्वीपणे पूर्ण केले. भारतातील पहिल्या अणुसंशोधन रिअॅक्टर 'अप्सरा'च्या निर्मितीत त्यांचा मोलाचा सहभाग होता. ते या प्रकल्पाचे प्रमुख अभियंता होते. अणुऊर्जा क्षेत्रातील त्यांच्या अमूल्य योगदानाबद्दल त्यांना भारत सरकारने पद्मविभूषण या नागरी सन्मानाने गौरवले होते.

१९८७ मध्ये डॉ. श्रीनिवासन यांची अणुऊर्जा आयोगाचे अध्यक्ष आणि अणुऊर्जा विभागाचे सचिव म्हणून नियुक्ती झाली. त्याचबरोबर त्यांनी न्यूक्लिअर पॉवर कॉर्पोरेशन ऑफ इंडिया लिमिटेड (NPCIL) या महत्त्वपूर्ण संस्थेची स्थापना केली आणि तिचे पहिले अध्यक्ष म्हणून कार्य केले.

डॉ. भाभांच्या टीमचे महत्त्वाचे सदस्य

१९५५ मध्ये त्यांनी मुंबईतील भारतीय अणुसंस्थेमध्ये काम सुरू केले. त्याच दरम्यान त्यांना भारताच्या अणुऊर्जा कार्यक्रमाचे जनक डॉ. होमी भाभा यांच्यासोबत काम करण्याची संधी मिळाली. भाभा यांची टीम अत्यंत हुशार मानली जात होती आणि डॉ. श्रीनिवासन हे त्या चमूत एक महत्त्वाचा स्तंभ होते.

भारताच्या अणुऊर्जा प्रवासात डॉ. एम. आर. श्रीनिवासन यांचे स्थान अढळ आहे. अणुऊर्जा प्रकल्पांचे स्थापत्य, संशोधन आणि धोरणात्मक निर्णय यामध्ये त्यांनी दिलेले योगदान भारताला अणुऊर्जेच्या प्रकल्पात आघाडीवर नेणारे ठरले. त्यांच्या जाण्याने अणुऊर्जा क्षेत्रात मोठी पोकळी निर्माण झाली आहे. देशभरातून अनेक मान्यवरांनी त्यांना श्रद्धांजली अर्पण केली आहे.