फेसबुकला आता 'या' नावाने ओळखले जाणार

जगभरातील अब्जावधी वापरकर्ते असलेल्या फेसबुकने (facebook) आपले नाव बदलले आहे. गुरुवारी झालेल्या कंपनीच्या वार्षिक सर्वसाधारण सभेत नवीन नावाची घोषणा करण्यात आली. यापुढे फेसबुकला 'मेटा' (meta) या नावाने ओळखले जाणार आहे. ( facebook new name rebrand meta Mark Zuckerberg )

गेल्या अनेक दिवसांपासून फेसबुकचे (facebook )नाव बदलण्याची चर्चा सुरु होती. आज अधिकृत रित्या त्याची घोषणा करण्यात आली. या प्रक्रियेला रिब्रॅण्डिंग असे म्हणतात. फेसबुक रिब्रॅण्डिंगच्या माध्यमाने इन्स्टाग्राम, व्हॉट्सॲप आणि ऑक्युलस असे ॲप्स एकाच छताखाली येतील. याबाबत संस्थापक मार्क झुकेरबर्ग याने अलीकडेच सूतोवाच केले होते.

दरम्यान, फेसबुकच्या माजी कर्मचारी, माहिती तज्ञ फ्रान्सेस हॉगन यांच्याकडून फेसबुकबाबत खळबळजनक खुलासे केले जात आहेत. त्यांनी काही दिवसांपूर्वी अमेरिकी सिनेटच्या ग्राहक संरक्षक समितीसमोर फेसबुक कंपनीकडून नागरिकांची सुरक्षा धोक्यात आणून कशा रीतीने नफा कमावला जात आहे, याच पाढा वाचला होता. फेसबुक प्लॅटफॉर्मचा वापर हिंसाचार पसरविण्यासाठी केला जात आहे. या गोष्टी रोखण्यासाठी कंपनीकडून केले जाणारे उपाय हे खूपच त्रोटक आहेत, असा दावा केला. या घडामोडींच्या पार्श्वभूमीवर फेसबुकचे नाव बदलण्यात आले आहे.यापूर्वी २०१५ मध्ये गुगलनेही अल्फाबेट स्थापन करुन कंपनीचा विस्तार केला होता.