Google Ads Policy: डीपफेक पॉर्न बनवणाऱ्या अ‍ॅप्सवर गुगल करणार सर्जिकल स्ट्राईक, कडक केले जाहिरातीचे नियम

Google Ads Policy

डीपफेक पोर्नोग्राफी निर्माण करणाऱ्या वेबसाईट आणि अॅप्सची जाहीरात नाकारण्यासाठी गुगलने कठोर भूमिका घेतली आहे. गुगलने आपली जाहीरात पॉलिसी अपडेट केली आहे. ३० मे २०२४ पासून नवीन पॉलिसी लागू होणार आहे. एआयचा वापर करुन पोर्न सामग्री तयार करणाऱ्यांविरोधात लढा देण्याची गुगलचे उद्दीष्ट आहे.

गुगलच्या अयोग्य सामग्री धोरणांतर्गत, जाहिरातदारांनी डीपफेक पॉर्न निर्माण करणाऱ्या साइट्स किंवा ॲप्सचा प्रचार केल्यास तसेच ते कसे तयार करावे याच्या सूचना दिल्या किंवा विविध डीपफेक पॉर्न सेवांचे समर्थन आणि तुलना केल्यास त्यांना चेतावणीशिवाय करार रद्द करण्यात येणार आहे. ते पुन्हा गुगलवर जाहीरात देखील करु शकणार नाहीत.

पोर्नोग्राफिक सामग्री तयार करण्याचे अनेक अॅप्स मार्केटमध्ये वाढले आहेत. या पार्श्वभूमिवर गुगलने नवीन धोरण राबवले आहे. Apple ॲप स्टोअर आणि  Google Play Store वर देखील अनेक अॅप्स उपलब्ध आहेत.

Google ची धोरणे आधीच विशिष्ट प्रकारच्या लैंगिक सामग्री असलेल्या जाहिरातींवर कठोर निर्बंध घालतात. लैंगिकरित्या सुस्पष्ट किंवा नग्नता असणाऱ्या सिंथेटिक सामग्रीचा प्रचार करणे हे कंपनीच्या नियमांचे स्पष्ट उल्लंघन आहे.

धोरणातील बदलापूर्वी, Google ने आधीच खरेदी जाहिरातींमध्ये लैंगिकदृष्ट्या स्पष्ट डीपफेक तयार करणाऱ्या सेवांवर प्रतिबंध घालण्यास सुरुवात केली होती. या बंदीमध्ये डीपफेक पॉर्न ट्यूटोरियल आणि डीपफेक पॉर्न जनरेटरची जाहिरात करणारी वेबसाईट आणि अॅप्स समाविष्ट आहेत.

जाहिरातदारांना ३० मे लागू होण्याच्या तारखेपूर्वी नवीन धोरणाचे उल्लंघन करणाऱ्या कोणत्याही जाहिराती काढून टाकण्याची परवानगी देण्यात आली आहे. २०२३ मध्ये, Google ने त्याच्या वार्षिक जाहिरात सुरक्षा अहवालानुसार लैंगिक सामग्रीवरील धोरणांचे उल्लंघन केल्याबद्दल १.८ अब्ज जाहिराती काढून टाकल्या आहेत.