Internet Speed : इंटरनेट डाउनलोड स्पीडमध्ये भारताने ब्रिटन-जपानलाही टाकलं मागे; ग्लोबल इंडेक्समध्ये घेतली मोठी झेप!

पंतप्रधान मोदींच्या हस्ते भारतात 5G सेवेची सुरुवात करण्यात आली होती. यानंतर देशातील इंटरनेट डाऊनलोड स्पीडमध्ये भरपूर वाढ झाली आहे. जागतिक स्तरावर भारताने या बाबतीत जपान, ब्रिटन आणि ब्राझील अशा देशांनाही मागं टाकलं आहे.

ब्रॉडबँड आणि मोबाईल इंटरनेट नेटवर्क स्पीडची माहिती देणाऱ्या ओक्ला या संस्थेने ही आकडेवारी जाहीर केली आहे. जगातील सर्वाधिक इंटरनेट डाउनलोड स्पीड देणाऱ्या देशांच्या यादीमध्ये भारताने 72 स्थानांची झेप घेतली आहे. यानंतर स्पीडटेस्ट ग्लोबल इंडेक्समध्ये भारत 47व्या स्थानावर पोहोचला आहे.

देशात 5G आल्यानंतर मोबाईल इंटरनेट डाउनलोड स्पीडममध्ये 3.59 टक्के वाढ दिसून आली आहे. सप्टेंबर 2022 मध्ये सरासरी डाउनलोड स्पीड हा 13.87 MBPS होता. ऑगस्ट 2023 मध्ये हा वाढून 50.21 MBPS एवढा झाला आहे.

भारत कोणत्या देशांच्या पुढे?

इंटरनेट डाउनलोड स्पीडच्या बाबतीत भारत हा इंडोनेशिया, बांग्लादेश, श्रीलंका, पाकिस्तान या शेजारी राष्ट्रांपेक्षा कित्येक स्थानांनी पुढे आहे. एवढंच नव्हे, तर मेक्सिको, तुर्किये, ब्रिटन, जपान, ब्राझील आणि दक्षिण आफ्रिका अशा जी-20 सदस्य देशांनाही भारताने मागं टाकलं आहे.

सर्वाधिक स्पीड कुठे?

या यादीमध्ये पहिल्या क्रमांकावर युनायटेड अरब इमिरातीज हा देश आहे. याठिकाणी सरासरी मोबाईल इंटरनेट स्पीड हा 210.89 MBPS एवढा आहे. त्यानंतर दुसऱ्या क्रमांकावर कतार आणि तिसऱ्या क्रमांकावर कुवैत हा देश आहे. या यादीमध्ये चीन सहाव्या, तर अमेरिका 19 व्या क्रमांकावर आहे.