Emergency Alert : भारत सरकारने अँड्रॉईड मोबाईलवर पाठवला 'इमर्जन्सी अलर्ट'; काय आहे याचा अर्थ?

देशभरातील कित्येक अँड्रॉईड मोबाईल यूजर्सना आज एक इमर्जन्सी अलर्ट मिळाला. दुपारी 12:19 वाजेच्या सुमारास कित्येक अँड्रॉईड मोबाईलमध्ये एकाच वेळी मोठ्याने बीप वाजून हा अलर्ट मिळाला. यावर 'इमर्जन्सी अलर्ट : सीव्हिअर' असं लिहिलं होतं.

या मेसेजमध्ये लिहिलं होतं, की "हा एक सॅम्पल टेस्टिंग मेसेज आहे. भारत सरकारच्या टेलिकम्युनिकेशन विभागातील सेल ब्रॉडकास्टिंग सिस्टीमने हा मेसेज पाठवला आहे. कृपया हा मेसेज इग्नोर करा. यावर कोणत्याही प्रकारची प्रतिक्रिया देण्याची गरज नाही."

"हा मेसेज केवळ पॅन-इंडिया इमर्जन्सी अलर्ट सिस्टीमच्या चाचणीसाठी आहे. ही सिस्टीम राष्ट्रीय आपत्ती व्यवस्थापन विभागाकडून राबवण्यात येत आहे. लोकांच्या सुरक्षिततेसाठी आणि आपत्तीवेळी त्यांना वेळी सूचना देण्यासाठी याचा वापर होणार आहे." असंही यात म्हटलं आहे.

यापुढेही मिळतील अलर्ट

यापूर्वी 20 जुलै आणि 17 ऑगस्ट रोजी देखील अशा प्रकारचे अलर्ट देशभरातील अँड्रॉईड यूजर्सना मिळाले होते. ही चाचणी वेळोवेळी घेण्यात येणार असून, यापुढेही असे अलर्ट मिळणार असल्याचं सरकारने स्पष्ट केलं आहे.

कशासाठी आहे ही सिस्टीम?

एखाद्या नैसर्गिक आपत्तीवेळी देशातील सर्व नागरिकांना एकाच वेळी अलर्ट आणि धोक्याची सूचना देता यावी, यासाठी ही सिस्टीम लागू करण्यात येणार आहे. भूकंप, त्सुनामी, महापूर अशा संकटांवेळी जेव्हा मोबाईल नेटवर्क आणि इंटरनेट बंद असेल तेव्हादेखील या माध्यमातून लोकांना संदेश पाठवणं शक्य होणार आहे.