Science Day : 'विकसित भारताचं स्वप्न सत्यात उतरवण्यासाठी...'; PM मोदींनी दिल्या विज्ञान दिनाच्या शुभेच्छा! शेअर केला खास व्हिडिओ

PM Modi Wishes on National Science day : २८ फेब्रुवारी हा दिवस भारतात 'राष्ट्रीय विज्ञान दिन' म्हणून साजरा केला जातो. यानिमित्ताने पंतप्रधान मोदींनी एक खास व्हिडिओ शेअर करत देशातील वैज्ञानिकांना आणि सर्व नागरिकांना शुभेच्छा दिल्या आहेत. या व्हिडिओच्या माध्यमातून PM मोदींनी वैज्ञानिकांना प्रोत्साहन दिलं आहे. आपल्या एक्स हँडलवरुन पंतप्रधानांनी हा व्हिडिओ शेअर केला आहे.

"आमचं सरकार लहान मुले आणि तरुणांमध्ये रिसर्च अँड इनोव्हेशनला चालना देण्यासाठी सातत्याने काम करत आहे. विकसित भारताचं आपलं स्वप्न सत्यात उतरवण्यासाठी हे महत्त्वाचं आहे", असं पंतप्रधानांनी आपल्या पोस्टमध्ये म्हटलं आहे.

थोर भारतीय वैज्ञानिक सी.व्ही. रामन यांनी प्रकाशाच्या विकिरणाबद्दल संशोधन केलं होतं. त्यांनी लावलेल्या शोधाला 'रामन इफेक्ट' म्हणून ओळखलं जातं. याच शोधासाठी त्यांना विज्ञान क्षेत्रातील सर्वोच्च समजला जाणारा नोबेल पुरस्कार देखील मिळाला होता. त्यांच्या सन्मानार्थ आजचा दिवस हा राष्ट्रीय विज्ञान दिन म्हणून साजरा केला जातो.

विकसित भारतासाठी..

यावर्षीच्या विज्ञान दिनाची थीम ही 'विकसित भारतासाठी स्वदेशी तंत्रज्ञान' अशी आहे. मोदी सरकारच्या मेक इन इंडिया अभियानाअंतर्गत जगभरातील कित्येक कंपन्या सध्या भारतात येत आहेत. कित्येक इलेक्ट्रॉनिक गोष्टींचं उत्पादन सध्या भारतातच सुरू आहे. स्मार्टफोन, लॅपटॉप अशा गोष्टींसोबतच सेमीकंडक्टर आणि उपग्रह देखील भारतात तयार करण्यासाठी विदेशी कंपन्या उत्सुक आहेत. काही दिवसांपूर्वीच सरकारने अंतराळ संशोधन क्षेत्रासाठी देखील 100 टक्के FDI ला परवानगी दिली आहे.