Open AI Sora : फक्त स्क्रिप्ट एंटर करा, अन् सिनेमा होईल तयार! 'ओपन एआय'ने केलं खास व्हिडिओ बनवणारं टूल

Open AI new Video Generation tool Sora : एआय म्हटलं की सर्वांच्या डोळ्यासमोर एकच नाव येतं - चॅटजीपीटी! ओपनएआय कंपनीने बनवलेला हा चॅटबॉट तुम्हाला तुमच्या प्रश्नांची उत्तरं देतो, तसंच टेक्स्ट टू फोटो जनरेशन देखील करतो. मात्र, याच कंपनीने आता एक नवीन एआय मॉडेल सादर केलं आहे; जे टेक्स्ट कमांड वाचून चक्क व्हिडिओ तयार करणार आहे.

Sora असं नाव असणारे हे आर्टिफिशिअल इंटेलिजन्स मॉडेल सध्या टेक्स् वाचून एका मिनिटाचे व्हिडिओ बनवू शकते. हे मॉडेल रिसर्च स्टेजमध्ये असून, अद्याप कोणत्याही प्रॉडक्टसोबत लाँच केलेलं नाही. कंपनीचे सीईओ सॅम अल्टमन यांनी आपल्या एक्स हँडलवरुन याबाबत माहिती दिली. सध्या सोरा हे केवळ ठराविक लोकांना उपलब्ध करुन देण्यात आलं आहे. (ChatGPT Sora)

लोकांकडून मागवले इनपुट

सॅम अल्टमन (Sam Altman) यांनी आपल्या पोस्टमध्ये सोरा कशाप्रकारे काम करतं हे दाखवण्यासाठी मुख्य वेबसाईटची लिंक दिली. सोबतच त्यांनी लोकांना देखील आवाहन केलं होतं. "तुम्हाला जो व्हिडिओ पहायचा आहे, त्याचं कॅप्शन लिहून पाठवा.. आम्ही त्यानुसाार व्हिडिओ बनवायला सुरू करू" असं त्यांनी आपल्या पोस्टमध्ये म्हटलं होतं. (How to use Sora)

यावेळी त्यांनी काही यूजर्सच्या इनपुटनुसार त्वरित व्हिडिओही बनवून दाखवले. 'सोरा' विविध प्रकारचे कॅरेक्टर्स, मोशन्स, सब्जेक्टच्या डीटेल्स आणि बॅकग्राऊंड देखील तयार करू शकतं. कितीही जटिल व्हिडिओ असला, तरी तो बनवण्यास सोरा सक्षम आहे. एवढंच नाही, तर एकाच व्हिडिओमध्ये विविध अँगल्स आणि शॉट्स देखील सोरा बनवू शकतं; अशी माहिती ओपन एआयने दिली आहे. (Sora AI Tool)

संपूर्ण मूव्ही बनवता येणार?

अद्याप सोरा रिसर्च स्टेजमध्ये आहे, त्यामुळे त्यामध्ये केवळ एका मिनिटांचे व्हिडिओ तयार होतात. मात्र, लाँच झाल्यानंतर देखील तुकड्या-तुकड्यांमध्ये शॉट्सची माहिती देऊन एक संपूर्ण मूव्ही सोराकडून तयार करून घेणं अशक्य नसेल, असं मत तज्ज्ञांनी व्यक्त केलं आहे. यामुळे केवळ एक व्यक्ती एका ठिकाणी बसून एक संपूर्ण चित्रपट बनवू शकेल, असंही तज्ज्ञांनी म्हटलं आहे.