Vi 5G : व्होडाफोन-आयडियाच्या ग्राहकांना कंपनीचं दिवाळी गिफ्ट, 5G सेवा केली सुरू; 'या' शहरांमध्ये उपलब्ध

व्होडाफोन-आयडिया, म्हणजेच व्ही कंपनीच्या ग्राहकांसाठी एक आनंदाची बातमी आहे. कंपनीने दिल्ली आणि पुण्यामध्ये आपली 5G सेवा सुरू केली आहे. यामुळे आता जिओ आणि एअरटेलनंतर 5G सेवा उपलब्ध करणारी व्ही देशातील तिसरी कंपनी ठरली आहे.

कंपनीच्या वेबसाईटवर याबाबत माहिती देण्यात आली आहे. यूजर्स 5G रेडी सिमकार्डच्या मदतीने 5G सेवेचा लाभ घेऊ शकतात. इंडिया मोबाईल काँग्रेस 2023 मध्येच कंपनीचे प्रमोटर कुमार मंगलम बिर्ला यांनी 5G नेटवर्क सुरू करण्याचे संकेत दिले होते. त्यानंतर आता ही सेवा सुरू केल्याचं स्पष्ट झालं आहे.

कंपनीला मिळणार संजीवनी?

व्होडाफोन आयडिया कंपनी मोठ्या तोट्यात आहे. कंपनीचा यूजरबेस दिवसेंदिवस कमी होत चालला आहे. त्यातच प्रतिस्पर्धी कंपन्यांनी 5G सेवा लाँच केल्यामुळे व्ही आणखीच मागे राहिलं होतं. आता 5G सेवा सुरू केल्यामुळे कंपनीला नवसंजीवनी मिळते का हे पाहणं औत्सुक्याचं ठरणार आहे.

आपल्या यूजर्सना जोडून ठेवण्यासाठी व्ही कंपनी कित्येक नवनवीन प्लॅन्स लाँच करत आहे. कंपनीने भविष्यासाठी देखील मोठ्या योजना आखल्या आहेत. यावर्षीच्या इंडिया मोबाईल काँग्रेसमध्ये कंपनीने Vi C-DOT IoT लॅब, व्ही गेम्स, क्लाउड प्ले, व्हीआर गेम्स, एक्सआर एज्युटेक अशा गोष्टी सादर केल्या होत्या. यातील बहुतांश टेक हे 5G वर आधारित आहेत.