Viral Video : धक्कादायक! सरकारी डॉक्टरांऐवजी होमगार्डनेच काढला महिलेचा एक्स-रे

लखनऊ : उत्तरप्रदेशमध्ये एका सरकारी दवाखान्यातील अजब प्रकार समोर आला आहे. सरकारी डॉक्टरांऐवजी एका होमगार्ड कर्मचाऱ्याने महिलेचा एक्सरे काढला आहे. उत्तरप्रदेशातील बलिया येथे ही घटना घडली असून या प्रकाराचा व्हिडिओ सध्या सोशल मीडियावर व्हायरल झाला आहे.

व्हायरल होत असलेल्या व्हिडिओमध्ये गार्ड एका महिलेला एक्सरे रूम मध्ये घेऊन येतो, तिला हात वर करायला सांगतो आणि त्यानंतर एक्सरे मशीन खाली ओढताना दिसत आहे. तर या ठिकाणी अजून एक होमगार्ड व्हिडिओत दिसत आहे. याप्रकरणी बलियाचे जिल्हा दंडाधिकारी रवींद्र कुमार म्हणाले की, अधिकाऱ्यांनी व्हिडिओची दखल घेतली आहे आणि मुख्य वैद्यकीय अधिकाऱ्यांनाही याबाबत सतर्क करण्यात आले आहे. गार्डने नेमकं काय काय केलं, याचा सविस्तर अहवालही मागवण्यात आल्याचे त्यांनी सांगितले.

दरम्यान, "हे महिलेच्या आरोग्याशी खेळत आहे. जर मशीन चुकीच्या पद्धतीने चालवली गेली असती तर काहीतरी चूक झाली असती. अशा वेळी जबाबदारी घेतली पाहिजे," असं कुमार पुढे म्हणाले.