मॉलच्या टॉयलेटमध्ये घुसले दरोडेखोर; बंदुकीचा धाक दाखवून बूट चोरले, CCTV Footage Viral

सोशल मीडियावर चोरीचे अनेक व्हिडिओ व्हायरल होत असतात. कधी कधी सशस्त्र दरोडा तर कधी हल्ला करून दरोडा टाकला जातो. नकळत एखादी वस्तू दुकानातून चोरून नेल्याच्या घटनासुद्धा अनेकदा घडल्या आहेत. पण बंदुकीचा धाक दाखवून थेट तीन जणांचे बूट चोरून नेल्याची घटना पहिल्यांदाच ऐकली असेल. हे ऐकून आपल्यालाही हसू आवरणार नाही.

ही घटना कॅलिफोर्निया देशात घडली असून तेथील इरविन या शहरातील एका शॉपिंग मॉलमध्ये दोन चोरटे घुसले होते. त्यांनी बंदुकीचा धाक दाखवून तेथील टॉयलेटमध्ये असलेल्या तीन व्यक्तींच्या पायातील बूट काढायला सांगितले आणि घेऊन गेले. बाहेर पडताना ते वेगाने धावत होते. हे थरारक सीसीटीव्ही फुटेज सोशल मीडियावर व्हायरल झाले आहेत.

दरम्यान, मॉलमधून बाहेर पडल्यानंतरही त्यांना सीसीटीव्ही कॅमेऱ्यात टिपले गेले असून त्यानुसार पोलिसांनी त्यांची ओळख पटवली आणि त्यांच्यावर कारवाई केली आहे. पोलिसांनीच त्यांचा व्हिडिओ ट्वीटरवर शेअर केला असून त्या दरोडेखोरांवर कारवाई केल्याचं सांगितलं आहे. तर हा व्हिडिओ नेटकऱ्यांनी चांगलाच शेअर केला असून त्यावर आपल्या प्रतिक्रिया व्यक्त केल्या आहेत.