Marathi Announcement : 'बंधू आणि भगिनींनो...'; SpiceJet च्या विमानात सहचालिकेने केली मराठीत उद्घोषणा | Video Viral

पुणे : पुण्याहून गोवा येथे जाणाऱ्या स्पाईस जेटच्या एका सहचालिकेने विमानातील प्रवाशांसमोर मराठी उद्घोषणा केली आहे. पुण्याहून उड्डाण करण्याच्या अगोदर ही उद्घोषणा केली असून हा व्हिडिओ सोशल मीडियावर व्हायरल झाला आहे. महाराष्ट्रातून उड्डाण होणाऱ्या प्रत्येक विमानात मराठीतून उद्घोषणा झाली पाहिजे अशी मागणी मराठी एकीकरण समितीने केली आहे.

दरम्यान, संजना अमृते असं या विमान सहचालिकेचे नाव आहे. त्यांनी बंधू आणि भगिनींनो असं म्हणत आपल्या मराठी उद्घोषणेची सुरूवात केली आहे. मुख्य विमान चालक मोहीत कुमार हे असून संजना अमृते या सहचालिका आहेत. पायलट कवी अशी त्यांची इंस्टाग्रामवर ओळख असल्याचंही संजना यांनी सांगितलं.

मराठी एकीकरण समितीने आपल्या ट्वीटर हँडलवरून हा व्हिडिओ पोस्ट केला असून प्रत्येक विमानात अशा प्रकारची मराठीतून उद्घोषणा झाली पाहिजे अशी मागणी करण्यात आली आहे. हा व्हिडिओ सोशल मीडियावर चांगलाच व्हायरल झाला असून नेटकऱ्यांनीही त्यावर आपल्या प्रतिक्रिया व्यक्त केल्या आहेत.