Navneet Rana Video : खासदार राणा बनल्या TDM; ट्रॅक्टरवर बसून केली शेतीची मशागत

अमरावती : खासदार नवनीत राणा या कायम कोणत्या ना कोणत्या स्टंटसाठी प्रसिद्ध असतात. ग्रामीण भागात जाऊन गाडी चालवणे असो किंवा आदिवासी पाड्यावर जाऊन त्यांच्या सण उत्सवामध्ये डान्स करणे असो किंवा वाद्य वाजवणे असो त्या कायम चर्चेत असतात. सध्या त्यांचा एक व्हिडिओ सोशल मीडियावर व्हायरल झाला आहे.

व्हायरल होत असलेल्या व्हिडिओमध्ये त्या एका शेतकऱ्याच्या शेतात जाऊन ट्रॅक्टर चालवताना दिसत आहेत. त्याचबरोबर शेतातील पेरणीपूर्ण मशागतीचा त्यांनी आढावा घेतला आहे. अमरावती जिल्ह्यातील मोर्शी तालुक्यातील प्रमोद फरतोडे या शेतकऱ्याशी त्यांनी संवाद साधला.

त्याचबरोबर शेतकऱ्यांच्या समृद्धीसाठी निसर्गदेवतेकडे मागणी केली आहे. त्यांचा हा व्हिडिओ सोशल मीडियावर चांगलाच व्हायरल झाला आहे.

शेतात त्यांनी महिंद्रा कंपनीचा ट्रॅक्टर चालवला असून महिंद्रा ट्रॅक्टरच्या ड्रायव्हरला ग्रामीण भागातं TDM म्हणून ओळखलं जातं. त्यामुळे खासदार नवनीत राणा आज TDM बनल्या असं म्हणायला हरकत नाही. त्या आपल्या मतदारसंघात कायम फिरत असतात. जनतेच्या वेगवेगळ्या समस्या जाणून घेत असतात. तर यामुळे त्या सोशल मीडियावर चर्चेतही असतात.