VIDEO : नातेवाईकांसमोर झाली नाचक्की, पठ्ठ्यानं लढवली अनोखी शक्कल; कार गाढवानं खेचत सर्व्हिस सेंटरला नेली

Rajasthan News : राजस्थानच्या उदयपूरमध्ये एका तरुणानं कार खरेदी केली. मात्र, ही कार दीड महिन्यातच बिघडली. कार बिघडल्यामुळं हा तरुण खूप वैतागला. साखरपुड्यासाठी तो सासुरवाडीला पोहचला, तेव्हाच नेमकी त्याची कार खराब झाली.

त्यानं कंपनीत दुरुस्तीसाठी कार घेऊन जाण्यासाठी फोन केला. मात्र, कंपनीनं काही फारसं लक्ष दिलं नाही. त्यानंतर या तरुणानं चक्क आपली कार गाढवाकडून खेचत शोरुममध्ये पोहचवली. याचा व्हिडिओ समोर आलाय.

मिळालेल्या माहितीनुसार, उदयपूरच्या सुंदरवास इथं राहणारे राजकुमार पुरबिया यांनी क्रेटा कार खरेदी केली होती. कार खरेदी केल्यानंतर दीड महिन्यातच त्यात बिघाड निर्माण झाली. एके दिवशी राजकुमार आपल्या साखरपुड्यासाठी गेला असताना तिथंही कारमध्ये खराबी जाणवली. राजकुमार यांनी कंपनीला याबाबत फोन करून माहिती दिली आणि गाडी घेऊन जाण्यास सांगितलं. मात्र, कंपनीनं गाडी तात्काळ घटनास्थळावरून नेण्यास असमर्थता दर्शवली, त्यामुळं राजकुमार यांना राग अनावर झाला.

शोरूम व्यवस्थापनाचा निषेध

कार शोरूम व्यवस्थापनाच्या या वागण्यामुळं कार मालक इतके संतापले की, त्यांनी निषेध करण्याचा अनोखा मार्ग निवडला. राजकुमार यांनी आपली नवीन गाडी चक्क गाढवाकडून खेचत शोरुममध्ये पोहचवली आणि कंपनीच्या शोरूमचा आणि कर्मचाऱ्यांच्या वागणुकीचा निषेध केला. या संपूर्ण प्रकरणाचा व्हिडिओही समोर आला आहे.

18.50 लाखांना खरेदी केली 'क्रेटा'

कार मालक राजकुमार सांगतात, क्रेटा कारचे दुसरे टॉप मॉडेल सुमारे 18.50 लाख रुपयांना विकत घेतले होते. परंतु, कार खरेदी केल्यानंतर एक ते दीड महिन्यातच समस्या सुरू झाली. माझ्या साखरपुड्यासाठी गाडी नेली होती, परंतु तिथंही बिघाड निर्माण झाली. त्यानंतर कंपनीला फोन करून गाडी घेण्यास सांगितलं. मात्र, कंपनीनं सकाळी 9 ते सायंकाळी 7 वाजेपर्यंत गाडी घेण्यास असमर्थता दर्शवल्याचं राजकुमार यांनी सांगितलं.