'मी जेवढा चांगला तेवढाच वाईट, पायाखाली तुडवेन'; शिंदे गटाचे आमदार बांगरांची कंडक्टरला शिवीगाळ | Video Viral

हिंगोली : हिंगोलीतील कळमनुरी येथील शिवसेनेचे आमदार संतोष बांगर यांनी एसटी महामंडळाच्या कर्मचाऱ्यांना कार्यालयात जाऊन शिवीगाळ करून धमकी दिल्याचा धक्कादायक प्रकार घडला आहे. मुलींना शाळेतून घरी जाण्यासाठी वेळेवर बस का मिळत नाहीत असा सवाल करत त्यांनी धमकी दिली असून याप्रकरणाचा व्हिडिओ सोशल मीडियावर व्हायरल झाला आहे.

दरम्यान, मुलींना शाळेतून घरी जाण्यासाठी वेळेवर बस मिळत नसल्याची तक्रार कुणीतरी बांगर यांच्याकडे केली होती. त्यानंतर त्यांनी थेट कळमनुरी बस स्टँड गाठले आणि आगार व्यवस्थापकासमोर कंडक्टरला शिवीगाळ केली.

त्याचबरोबर, "तुमच्या बापाची बस आहे का? काही चुकीचं घडलं किंवा कामात सुधारणा झाली नाही तर पायाखाली तुडवेन, तुम्हाला माहितीये माझं काम कसं असतं तर, मी जेवढा चांगला आहे तेवढाच खराब आहे, मला काही कमीजास्त वाटलं तर त्याला लोळेस्तोर मारेल अशी धमकीसुद्धा दिली. यावेळी शाळेतील विद्यार्थिनीही आगारात उपस्थित होत्या.

एखाद्या लोकप्रतिनिधींच्या तोंडून अशी शिवराळ भाषा निघणे कितपत योग्य आहे? असा सवाल आता मतदारांकडून उपस्थित केला जात आहे. तर या प्रकरणाचा व्हिडिओ समोर आला असून अनेकांकडून संतप्त प्रतिक्रिया व्यक्त केल्या जात आहेत.