चेकपोस्टवरील पोलिसांची नजर चुकवून आडमार्गाने 'ते' आले खरे...पण.

नाशिक / घोटी : मुंबईबाहेर पडणारी परप्रांतीय नागरिकांची संख्या थांबण्याचे नाव घेत नसल्याचे समोर येत आहे. चेकपोस्टवरील पोलिसांची नजर चुकवून आडमार्गाने आलेल्या नागरिकांना अपर पोलिस अधीक्षक शर्मिष्ठा वालावलकर, उपविभागीय पोलिस अधिकारी अरुंधती राणे यांच्या नेतृत्वाखाली सहाय्यक पोलिस निरीक्षक जालिंदर पळे यांच्या पथकाने पेट्रोलिंगदरम्यान 41 परप्रांतीयांवर संचारबंदी मोडल्याने घोटी पोलिस ठाण्यात गुन्हे दाखल केले आहेत. 

मजल-दरमजल करत मोठमोठ्या लोंढ्यांचा प्रवास सुरू
काही झाले तरी गावाकडे जायचे या आशेने परप्रांतीय नागरिक भरउन्हात अंगाची लाहीलाही होत असताना पायीच 145 किलोमीटर अंतर पार करत आहेत. प्रवासादरम्यान डोक्‍यावर सुखा शिधा, पाण्याचे प्लॅस्टिक ड्रम सोबत घेऊन वाटचाल करणाऱ्या तब्बल 41 नागरिकांना घोटी येथे पकडण्यात आले. रात्रीच्या अंधारात पायी मजल-दरमजल करत मोठमोठ्या लोंढ्यांनी प्रवास सुरू असल्याचे पोलिसांच्या लक्षात येताच घोटी पोलिसांकडून कारवाई करण्यात आली. शहरातील सेवाभावी संस्थांच्या माध्यमातून नागरिकांना जेवण देत विशेष वाहनातून पुन्हा मुंबईकडे रवाना करण्यात आले.

हेही वाचा > धक्कादायक! दाम्पत्य दिवसभर घरातच बसायचे अन् रात्री घराबाहेर फिरायचे...कस्तुरबा रुग्णालयातील नर्सचे इगतपुरी कनेक्‍शन..

परप्रांतीय नागरिकांमुळे परिसरात भीतीचे वातावरण

स्थानिक पातळीवर नागरिक घराबाहेर पडत नसले तरी बाहेरून येत असलेल्या परप्रांतीय नागरिकांमुळे परिसरात भीतीचे वातावरण निर्माण झाले आहे. सहाय्यक पोलिस निरीक्षक जालिंदर पळे, उपनिरीक्षक विलास घिसाडी, आनंदा माळी, सहाय्यक उपनिरीक्षक अनिल धुमसे, हवालदार विश्‍वास पाटील, कृष्णा कोकाटे, शीतल गायकवाड, बिपीन जगताप, रविराज जगताप, गणेश सोनवणे, भास्कर महाले, प्रकाश कासार, विक्रम झाल्टे, राजेंद्र कांगणे आदी पथकातील कर्मचारी परिस्थितीवर लक्ष ठेवून आहेत. 

हेही वाचा > लॉकडाउन दरम्यान पहाटे संशयास्पद कंटेनरला पोलीसांनी अडवला...झडती घेतली तेव्हा धक्काच!