घरी नव्या पाहुण्याची तयारी सुरु होती...अन् अचानक असा कोसळला दु:खाचा डोंगर की..

नाशिक : प्रसूतीदरम्यान मृत बालक जन्मास आल्याच्या कारणातून महिलेच्या कुटुंबीयांनी गोंधळ घातल्याचा प्रकार शनिवारी डॉ. झाकिर हुसेन रुग्णालयात घडला. कर्मचारी आणि डॉक्‍टरांच्या हलगर्जीमुळे मृत बालक जन्मास आल्याचा आरोप त्यांनी केला. पोलिसांच्या मध्यस्थीनंतर वादावर पडदा पडला. 

मातेचा व कुटुंबिंयांचा रुग्णालयातच ह्रदय पिळवटून टाकणारा आक्रोश...

बजरंगवाडी येथील माया पवार (वय 30) यांना प्रसूतीसाठी शुक्रवारी (ता. 24) सकाळी कथडा येथील डॉ. झाकिर हुसेन रुग्णालयात दाखल केले. शनिवारी (ता. 25) रात्री दहाच्या सुमारास त्यांची प्रसूती झाली. प्रसूतीदरम्यान पुरुष जातीचे मृत बालक जन्मास आले. बालकाच्या मृत्यूची माहिती समजताच पवार कुटुंबीयांनी रुग्णालयात गोंधळ घातला. डॉक्‍टर आणि कर्मचाऱ्यांच्या हलगर्जीमुळे बाळ जन्मापूर्वीच दगावल्याचा आरोप केला. कर्मचाऱ्यांना किरकोळ मारहाणही केली. रुग्णालयात तणावाचे वातावरण निर्माण झाले. भद्रकालीचे वरिष्ठ पोलिस निरीक्षक साजन सोनवणे कर्मचाऱ्यांसह रुग्णालयात दाखल झाले. त्यांनी मध्यस्थी करत कुटुंबीयांची समजूत काढली. त्यात डॉक्‍टर किंवा कर्मचाऱ्यांचा दोष नसल्याचे सांगितले. पवार कुटुंबीयांनी महिलेची सोनोग्राफी केली नसल्याची माहिती समोर आली. सोनोग्राफी झाली असती तर बाळाच्या वाढीसंबंधित माहिती मिळू शकली असती, अशी माहिती रुग्णालयातील कर्मचाऱ्यांनी पोलिसांना दिली. पोलिसांनी दोघांची समजूत काढत वाद मिटविला. भद्रकाली पोलिसांत आकस्मिक मृत्यूची नोंद करण्यात आली.  

हेही वाचा > शंभर वर्षांचं गुहेतलं "त्यांचं" वास्तव्य..कठीण वनवास..अन् गुहेतून गृहप्रवेश!

हेही वाचा > आईच निघाली उलट्या काळजाची..शेवटी मुलाने संतापात..​