सिमेंट, स्टीलची दरवाढ मागे घ्या; अन्यथा बांधकाम व्यावसायिक छेडणार आंदोलन

सटाणा (जि. नाशिक) : सिमेंट व स्टीलच्या दरात तब्बल ४० ते ५० टक्क्यांनी वाढ झाल्याने बांधकाम क्षेत्राचे कंबरडे मोडले आहे. उत्पादकांवर शासनाचा अंकुश नसल्याने सिमेंट व स्टील कंपन्यांनी मनमानी पद्धतीने दरवाढ केली आहे.

या दरवाढीच्या निषेधार्थ पुकारलेल्या देशव्यापी संपात सहभागी होत बिल्डर्स असोसिएशन ऑफ इंडिया मालेगाव सेंटरअंतर्गत सटाणा शहर व बागलाण तालुक्यातील सर्व बांधकाम ठेकेदार संघटना व मजूर संघटनांतर्फे शुक्रवारी (ता. १२) कामबंद आंदोलन छेडण्यात आले. शासनाने कंपन्यांवर नियामक प्राधिकरण नियुक्त करून दरवाढ मागे घ्यावी, अन्यथा तीव्र आंदोलन छेडण्याचा इशारा संघटनांनी निवेदनाद्वारे दिला आहे. 

हेही वाचा> बहिणीपाठोपाठ भावाची उत्तुंग कामगिरी! एकाच आठवड्यात सुराणा कुटुंबाला जणू जॅकपॉट 

बांधकाम क्षेत्रावर विपरीत परिणाम

सकाळी अकराला बिल्डर्स असोसिएशन ऑफ इंडिया मालेगाव सेंटरचे अध्यक्ष रवींद्र अहिरे यांच्या नेतृत्वाखाली सर्व बांधकाम ठेकेदार संघटना व मजूर संघटनांच्या पदाधिकारी व सदस्यांनी तहसीलदार जितेंद्र इंगळे-पाटील यांना निवेदन दिले. लॉकडाउननंतर बांधकाम साहित्याच्या दरात मोठी भाववाढ झाल्याने बांधकाम क्षेत्रावर विपरीत परिणाम झाला आहे. यामुळे सर्वसामान्यांना घरखरेदी करणे आता परवडत नाही. सरकारी कामे व इन्फ्रास्ट्रक्चरशी संबंधित कामांनाही या दरवाढीचा मोठा फटका बसत आहे. कोरोना महामारीमुळे अगोदरच असंख्य अडचणी असताना दरवाढीमुळे बांधकाम क्षेत्राचे कंबरडेच मोडले आहे, असा आरोप करण्यात आला. राहुल भदाणे, राजेंद्र पवार, डी. एम. पाटील, अजय पाटील, संदीप बागूल, धनश्री ठाकरे, नितीन वाघ, शिवाजी रौंदळ, प्रशांत रौंदळ, दत्तू बैताडे, संजय वाघ, स्वप्नील वीरगावकर, मयूर पाटील, मंगेश खैरनार, दीपक सोनवणे, सुनील सोनवणे, विलास सूर्यवंशी, नीलेश अमृतकार, दीपक आहिरे, संदीप कापडणीस, नाना मोरकर, रमेश भामरे, कुणाल सोनवणे, संदीप कापडणीस, सनी शर्मा, मनीष देवरे, अरुण भामरे, अमित बधान, वसंत मुंडावरे आदी उपस्थित होते. 

हेही वाचा> काय सांगता! विवाह आणि तो ही फक्त ५१ रुपयांत; कोणीही मोहिमेत होऊ शकतं सहभागी