चक्क थेट संपर्क टाळण्यासाठी 'कि-चेन'?...'या' विद्यार्थ्यांची आयडियाची कल्पना तर जाम भारी!

नाशिक : (गणूर) कारखाने, ऑफिस, लिफ्ट, एटीएम आदी ठिकाणी आपल्या हातांचा थेट संपर्क वस्तूंना होऊ नये म्हणून चांदवड येथील नेमिनाथ जैन संस्थेतील अभियांत्रिकी महाविद्यालयातील विद्यार्थी चैतन्य ठाकूर याने तयार केलेले अनोख "की-चेन' कोरोना संक्रमण टाळण्यासाठी उपयोगी ठरणार आहे. कोरोनाविरुद्धच्या लढाईत अनिश्‍चित काळासाठी पूर्ण अर्थव्यवस्था ठप्प ठेवणे विकसनशील भारताला परवडणारे नाही. यामुळे लॉकडाउन शिथिल केलेल्या भागात चैतन्य ठाकूरचे हे संशोधन कामी येणार आहे. 

थेट संपर्काला आळा बसून संक्रमण रोखणे शक्‍य

चांदवड अभियांत्रिकी महाविद्यालयातील चैतन्यने थ्रीडी प्रींटिंग या अत्याधुनिक तंत्रज्ञानाचा उपयोग करून स्मार्ट की-चेनची निर्मिती केली आहे. हे स्मार्ट की-चेन घर, कार, ऑफिस यातील सर्व दरवाजे उघडणे व बंद करण्यासाठी वापरता येईल. त्याचप्रमाणे एटीएम, लिफ्ट, सार्वजनिक कॉम्प्युटरसाठी वापर करता येणार आहे. या उपकरणाच्या सहाय्याने थेट संपर्काला आळा बसून संक्रमण रोखणे शक्‍य होणार आहे. की-चेनमध्ये टच सेन्सर्स बसविण्यात आल्याने बऱ्याच ठिकाणी याचा स्मार्ट वापर शक्‍य होणार आहे. या विद्यार्थ्यास प्रा. राहुलकुमार सोनार व प्रा. दीपक संचेती यांचे मार्गदर्शन लाभले. 

हेही वाचा > 'या' क्षेत्राव्यतिरिक्त अत्यावश्‍यक सेवांवरील वेळेचे बंधन मागे; जिल्हाधिकाऱ्यांचा आदेश

या समाजापयोगी संशोधनाबद्दल विभागप्रमुख डॉ. एस. डी. संचेती, प्राचार्य डॉ. एम. डी. कोकाटे, विश्‍वस्त मंडळाचे अध्यक्ष बेबीलाल संचेती, उपाध्यक्ष दिनेश लोढा, प्रबंध समितीचे अध्यक्ष अजित सुराणा, महाविद्यालयाचे समन्वयक झुंबरलाल भंडारी व सुनीलकुमार चोपडा यांनी चैतन्यचे कौतुक केले.  

हेही वाचा > ह्रदयद्रावक! आई कुठे शोधू तुला गं? लॉकडाऊनमध्ये आईला भेटण्याची धडपड ह्रदय हेलावणारी!