'इथं' बांधावरच होतेय कांदा खरेदी अन् विक्रीही...शेतकऱ्यांकडून देखील मिळतेय पसंती!

नाशिक : (खामखेडा) कोरोनाच्या पार्श्‍वभूमीवर काही बाजार समित्या सुरू, तर काही बंदमुळे कांदा उत्पादक अडचणीत आले आहेत. मात्र, अशा प्रतिकूल परिस्थितीत देवळा तालुक्‍यातील सावकी येथील फाइव्ह स्टार फार्मर प्रोड्यूसर कंपनीने थेट शेतकऱ्यांच्या बांधावर कांदा खरेदी करीत विक्रीचीही व्यवस्था केली आहे. बाजारापेक्षा दोन रुपये जागेवरच जास्त दर मिळत असल्याने शेतकरी त्यास पसंती देत आहे. 

20 व 50 किलो वजनाचे पॅकिंग

या कंपनीद्वारे तालुक्‍यातील सावकी, खामखेडा, दारणा, विठेवाडी या गावांमधून आतापर्यंत 1000 ते 1200 टन कांद्याची खरेदी केली आहे. शेतकऱ्यांच्या शेतातच हाताळणी, प्रतवारी करून 20 व 50 किलो वजनाचे पॅकिंग केले जाते. यासाठी लागणाऱ्या गोण्या, साहित्य व वाहतूक व्यवस्था कंपनीकडून शेतकऱ्यांना पुरविण्यात आली आहे. मालाचा चेन्नई, मुंबई येथील व्यापारी, सह्याद्री फार्मर्स प्रोड्यूसर कंपनीला पुरवठा केला जात आहे. कंपनीचे अध्यक्ष व व्यवस्थापकीय संचालक अनिल शिवले, उपाध्यक्ष प्रकाश पाटील, संचालक दिलीप पाटील, गणेश टिपले, भाऊसाहेब पवार, किरण निकम, नीलेश पाटील, सारिका शिवले आदी व्यवस्थापन करीत आहेत. तालुका कृषी अधिकारी सचिन देवरे, तालुका तंत्रज्ञान व्यवस्थापक महेश देवरे यांच्या समन्वयातून शेतकरी कंपनीला सहाय्य मिळत आहे. 

हेही वाचा > जागतिक पुस्तक दिन : स्मार्टफोनमध्ये हरविलेल्या पिढीला पुस्तकात दडलेली माणसे भेटतील का?

सध्या कांद्याला सात ते नऊ रुपये दर मिळत आहे. फाइव्ह स्टार फार्मर प्रोड्यूसर कंपनीने 14 रुपये दराने एक किलो पॅकिंग साइजमध्ये परिसरातून कांदा खरेदी केला. सध्या कुठलेच मार्केट सुरू नसताना शेतकऱ्यांच्या बांधावर खरेदी होत असून, चांगला दर मिळत आहे. - बापू बोरसे, सावकी, कांदा उत्पादक  

हेही वाचा > कोरोनाबाबत खोडसाळपणा करणाऱ्यांवर होणार कारवाई; आयुक्तांचा इशारा