नाशिक महापालिका निवडणुकीत काँग्रेस स्वबळवर; पदाधिकाऱ्यांचा राष्ट्रवादीवर हल्लाबोल

नाशिक : मागील निवडणुकीत सहयोगी पक्ष राष्ट्रवादी काँग्रेसने उमेदवार पळवितानाच काँग्रेस उमेदवारांसमोर बंडखोर उभे करून आघाडी धर्माला हरताळ फासला. यंदाच्या निवडणुकीत तसे होणार नाही. काँग्रेस स्वबळावर महापालिकेच्या निवडणुका लढविणार, अशी घोषणा शनिवारी (ता. २६) पदाधिकाऱ्यांनी केली. 

काँग्रेसला संपविण्याची भाषा करणारेच संपले

आगामी महापालिका निवडणुकीच्या पार्श्‍वभूमीवर काँग्रेस कमिटीमध्ये नगरसेवक, पदाधिकाऱ्यांची बैठक झाली. आमदार सुधीर तांबे, हिरामण खोसकर, निरीक्षक योगेंद्र पाटील प्रमुख मार्गदर्शक होते. निरीक्षक पाटील म्हणाले, की काँग्रेस सर्वसामान्यांचा पक्ष आहे. आगामी काळात पक्षाला गतवैभव प्राप्त करून देण्यासाठी कार्यकर्त्यांनी जोमाने कामास लागावे. आमदार तांबे म्हणाले, की कार्यकर्त्यांनी तळागळापर्यंत पोचून कामे करावी. आमदार खोसकर म्हणाले, की पक्षाचे काम प्रामाणिकपणे करावे. माजी नगरसेवक राजेंद्र बागूल यांनी काँग्रेसला संपविण्याची भाषा करणारेच संपल्याचे सांगितले. शहर महिला काँग्रेसच्या अध्यक्षा वत्सला खैरे यांनी आगामी निवडणुकीत महिलांना अधिकाधिक संधी देण्याचे सांगितले. नगरसेवक राहुल दिवे यांनी तरुणांना राजकारणात अधिक संधी देणार असल्याचे सांगितले. माजी मंत्री डॉ. शोभा बच्छाव, नगरसेविका आशा तडवी, हनिफ बशीर, सुरेश मारू, नीलेश खैरे, स्वप्नील पाटील, वसंत ठाकूर यांनी संबोधित केले. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

‘आघाडीचा धर्म पाळला नाही’ 

शहराध्यक्ष शरद आहेर म्हणाले, की गेल्या निवडणुकीत काँग्रेसचे उमेदवार पाडण्याचे काम राष्ट्रवादी काँग्रेसने करतं आघाडीचा धर्म पाळला नाही. यंदा अधिकाधिक काँग्रेस उमेदवार निवडून आणण्यासाठी वर्षाआधीच सुरवात करू. प्रदेश प्रवक्त्या डॉ. हेमलता पाटील यांनी घरचा आहेर देत पक्षातील काही नेत्यांकडूनच हानी पोचविण्याचे काम होत असल्याचा आरोप केला. संघटना मजबूत करण्याचे आवाहन करताना महापालिकेच्या कामकाजावर टीका केली. महापालिकेतील काँग्रेस गटनेते शाहू खैरे यांनी महापालिका ठेकेदार चालवत असल्याचा आरोप करत याविरोधात आंदोलन उभारणार असल्याचे सांगितले. 

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश