शहरातील आरोग्य सुविधांवरुन नगरसेवक आक्रमक; दिला रस्त्यावर उतरण्याचा इशारा

विक्रांत मते
Thursday, 24 September 2020

शहरात कोरोनारुग्णांची संख्या पन्नास हजारांचा आकडा पार करत असताना अद्यापही महापालिकेच्या सुविधा ताळ्यावर येत नसल्याने स्थायी समितीच्या सभेत पुन्हा नगरसेवकांचा बांध फुटला.

नाशिक : शहरात कोरोनाचा प्रादुर्भाव वाढताना हजाराच्या पटीत रुग्ण दाखल होत आहेत. परंतु महापालिकेच्या रुग्णालयांमध्ये सुविधा तर नाहीच, शिवाय खासगी रुग्णालयांमध्ये अद्यापही लूट सुरू असल्याने असे प्रकार थांबवा, अन्यथा नगरसेवकांना रस्त्यावर उतरावे लागेल, असाच इशारा स्थायी समितीच्या सभेत गुरुवारी (ता. २४) देण्यात आला. 

ऑक्सिजनसाठी पंधरा दिवस वाट

शहरात कोरोनारुग्णांची संख्या पन्नास हजारांचा आकडा पार करत असताना अद्यापही महापालिकेच्या सुविधा ताळ्यावर येत नसल्याने स्थायी समितीच्या सभेत पुन्हा नगरसेवकांचा बांध फुटला. ज्येष्ठ नगरसेवक सुधाकर बडगुजर यांनी प्रथम ऑक्सिजन पुरवठ्याचा विषय चर्चेला आणला. त्यावेळी प्रशासनाकडून अजब उत्तर मिळाले. ऑक्सिजनअभावी रुग्णांची हेळसांड होत असताना अद्यापही नवीन बिटको प्लॅन्ट उभारण्यात आला नसल्याची धक्कादायक बाब समोर आली. पंधरा दिवसांपूर्वी नवीन बिटको रुग्णालय व डॉ. झाकिर हुसेन रुग्णालयात ऑस्किजन प्लॅन्ट उभारण्याचा निर्णय घेण्यात आला. परंतु सध्या फाउंडेशनच्या कामावरच महापालिकेचे घोडे अडकल्याचे वैद्यकीय अधीक्षक डॉ. बापूसाहेब नागरगोजे यांच्या माहितीतून स्पष्ट झाले. फाउंडेशनपूर्वी टाक्या येणे महत्त्वाचे असल्याने त्यासाठी पंधरा दिवस लागणार असल्याचे बांधकाम विभागाकडून स्पष्टीकरण देण्यात आले. त्यामुळे गरीब रुग्णांना ऑक्सिजनसाठी पंधरा दिवस वेटिंगवर जाण्याची भीती निर्माण झाली. सभापती गणेश गिते यांनी लवकर ऑक्सिजन प्लॅन्ट उभारण्याच्या सूचना दिल्या. 

हेही वाचा > सराईत गुंड पम्याची दहशत झाली फुस्स! भर बाजारात जेव्हा पोलिसांनी काढली वरात

रेमडेसिव्हिरचा काळाबाजार 

एकीकडे ऑक्सिजनचे बेड मिळत नसताना शहरात खासगी रुग्णालयांकडून रेमडेसिव्हिरचा काळाबाजार होत आहे. शासनाने ठरवून दिलेल्या किमतीपेक्षा अधिक दराने विक्री होत आहे. रुग्णालयांकडून उपचार करताना रुग्णांच्या नातेवाईकांनाच औषध उपलब्ध करून देण्याची मागणी होत असून, अन्न व औषध प्रशासनाने ठराविक व मोठ्या रुग्णालयांमधील मेडिकलमध्येच रेमडेसिव्हिर औषध विकण्यास परवानगी दिली आहे. औषधांचा काळाबाजार होत असल्याचा आरोप प्रा. वर्षा भालेराव यांनी केला. 

व्हेंटिलेटर महापालिकेचे, वसुली खासगी रुग्णालयांची 

पीएम केअर फंडातून नाशिक महापालिकेला ५६ व्हेंटिलेटर प्राप्त झाले होते. त्यातील पंधरा व्हेंटिलेटर नादुरुस्तीवरून महापालिका प्रशासन अडचणीत सापडले होते. आता ज्या खासगी रुग्णालयांना बारा व्हेंटिलेटर वापरण्यासाठी देण्यात आले, त्यांच्याकडून महापालिकेने दिलेल्या व्हेंटिलेटरचा धंदा मांडण्यात आला आहे. दिवसाचे हजारो रुपये आकारले जात असल्याचा प्रकार समोर आला आहे. नवीन बिटको रुग्णालयात एकच स्ट्रेचर, प्रशासनाकडून तीन स्ट्रेचरचा खुलासा करण्यात आला. प्रा. शरद मोरे यांनी बिटको रुग्णालयात रुग्णांना गरम पाणी मिळत नसल्याची तक्रार केली.  

हेही वाचा > जिल्ह्यात पुन्हा रेमडेसिव्हिरच्या टंचाईसह काळा बाजार; रुग्णांच्या नातेवाइकांना नाहक मनस्ताप 

 

संपादन - रोहित कणसे


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: corporators are aggressive on the Health facilities issue nashik marathi news