दुर्दैवी! पत्नीच्या डोळ्यादेखत घडत होते सौभाग्याचे मृत्यूतांडव; हतबल पत्नीचा आक्रोश

नाशिक / सटाणा : विलास देवरे मळ्यात वास्तव्यास होते. शुक्रवारी (ता. १४) सकाळी साडेसातच्या सुमारास प्रचंड पाऊस झाला. या पावसात त्या हतबल पत्नीच्या डोळ्यादेखत त्याच्या सौभाग्याचे मृत्यूतांडव सुरु होते. 

अशी घडली घटना

पारनेर (ता. बागलाण) येथील विलास देवरे त्यांच्या ढोलबारे-पारनेर रस्त्यावरील शेवडी मळ्यात वास्तव्यास होते. शुक्रवारी (ता. १४) सकाळी साडेसातच्या सुमारास भीज पावसामुळे त्यांच्या राहत्या घराची भिंत कोसळली व भिंतीच्या ढिगाऱ्याखाली ते दाबले गेले. त्यांच्या पत्नीने आजूबाजूच्या शेतकऱ्यांना आवाज देत बोलावले व स्वतः मातीचा ढिगारा उपसण्यास सुरवात केली. ढिगाऱ्याखालून जखमी अवस्थेत त्यांना बाहेर काढले असता, त्यांच्या पाठीचा मणका व बरगड्यांची मोडतोड झाल्याने त्यांना असह्य वेदना होत होत्या. रक्तस्रावही जास्त झाल्याने जखमी अवस्थेत त्यांना सटाणा येथील एका खासगी अस्थिरोगतज्ज्ञाकडे दाखल केले असता, त्यांची प्रकृती अत्यवस्थ झाली. शेतकरी विलास यशवंत देवरे (वय ५५) यांचा त्यांच्या राहत्या घरी मळ्यात भिंत कोसळून मृत्यू झाला.

हेही वाचा > "कृष्णाचा जन्म जेलमध्ये झाला तेव्हा तुला जेलबाहेर पडायचंय?" सरन्यायाधीश बोबडेंचा आरोपीला प्रश्न; कोर्टात मजेशीर वातावरण

शासकीय मदत मिळण्याची मागणी

प्राथमिक उपचारानंतर नाशिकला नेताना त्यांचे रस्त्यातच साडेदहाला निधन झाले. त्यांच्यावर पारनेर येथे अंत्यसंस्कार करण्यात आले. आमदार दिलीप बोरसे यांनी घटनास्थळी भेट देऊन पंचनाम्याचे आदेश दिले. नैसर्गिक आपत्तीमुळे त्यांचे निधन झाल्याने शासकीय मदत मिळावी, अशी मागणी देवरे कुटुंबीयांनी केली आहे. आदिवासी शासकीय आश्रम विभागाचे निवृत्त मुख्याध्यापक प्रकाश यशवंत देवरे यांचे ते लहान बंधू होत.  

हेही वाचा > क्रूर नियती! "बाबा..तुमच्या दशक्रियेला नाही येऊ शकले..म्हणून तुमच्याकडेच आले" वडिलांमागे लेकीचीही अंत्ययात्रा

संपादन - ज्योती देवरे