निसर्गप्रेमी हळहळले! विकासाच्या नावाखाली कत्तल; चांदवडकरांच्या सुख-दुःखांचे साक्षीदार 'वड' जमीनदोस्त

नाशिक/चांदवड : नावातच 'वड' असणाऱ्या चांदवड तालुक्यातील शेकडो वडांच्या झाडांवर कुऱ्हाड पडल्याने समस्त चांदवडकर, निसर्गप्रेमी हळहळताना दिसले. निमित्त ठरलं चांदवड-मनमाड रस्त्याचं विस्तारिकरण. विकासाच्या गोंडस नावाखाली डेरेदार वृक्षांची कत्तल झाली. चांदवडकरांच्या कैक सुख-दुःखांचे साक्षीदार असलेले महाकाय वृक्ष जमीनदोस्त झाल्याने प्रत्येकालाच हुरहूर लागली.

शेकडो झाडांची कत्तल

चांदवड-मनमाड रस्ता कायम चर्चेत राहिला तो खड्डे अन खड्यामुळे झालेल्या अपघातामुळे. रस्त्याची दुरवस्था बघून सर्वपक्षीय आंदोलनेही झालीत पण 'आभाळ फाटलं त्याला ठिगळं कोठून लावणार' म्हणत डागडुजी वरती मजल गेली नाही. अखेर चौपदरीकरण रस्त्यास मंजुरी मिळाली आणि प्रत्यक्ष कामास सुरुवात झाली. या रस्त्याचे काम उत्कृष्टपणे होईल की नाही हे येत्या काळात दिसेल मात्र रस्ता विस्तारिकरण प्रक्रियेत मात्र शेकडो झाडांची कत्तल झाल्याने अनेक निसर्गप्रेमी दुखावले आहेत. 

हेही वाचा >  पतीनेच चोरीचा बनाव करत गरोदर पत्नीला संपविले; सासऱ्याची जावयाविरुध्द तक्रार

अनेक नियम पायदळी​

विकासाच्या प्रक्रियेत झाडांची कत्तल अपरिहार्य असली तरी चांदवड-मनमाड रस्त्यावरील झालेल्या झाडांच्या कत्तलीत अनेक 'अर्था' ने अनियमितता झालेली आढळून आली. याबाबत जीवन नागरी पर्यावरण प्राणी संरक्षण संस्थेचे सचिव विलास संसारे यांच्या मदतीने दै. 'सकाळ' ने पाठपुरावा केला असता, विकासाची प्रक्रिया राबविताना पर्यावरण संरक्षनाचे अनेक नियम पायदळी तुडविल्याचे उघड झाले. 

याबाबत आमच्या प्रस्तुत प्रतिनिधी ने चांदवड चे वनपरिक्षेत्र अधिकारी संजय पवार यांच्याशी संपर्क साधला असता, आत्तापर्यंत ज्याही वृक्षांची तोड झाली त्यापैकी ऐंशी टक्के झाडे ही चांदवड नगरपरिषद हद्दीतीलचं आहेत, याच हद्दीत जास्त मोठी झाडे होती. झाडे तोडताना वनविभागाकडून कुठलीही अनियमितता झाली नसल्याचे सांगण्यात आले मग अनियमितता झाली कुठे...? (वाचा क्रमशः)

हेही वाचा > ह्रदयद्रावक; आजोबांना दोन घास दिल्याचे समाधान घेऊनच नात झाली देवाला प्रिय, दसऱ्याच्या दिवशीच हळहळ