नाशिक / ओझर : एरवी अनेकवेळा चोरटे मंदिराच्या दरवाज्याचा कडी कोयंडा तोडून तेथील दानपेटी चोरून नेत असतात मात्र ओझर येथे चोरट्यांनी चक्क एक पाऊल पुढे असा धक्कादायक प्रकार केला आहे. याप्रकरणी ओझर पोलिस ठाण्यात ग्रामपालिकेतर्फे तक्रार दाखल करण्यात आली
काय घडले वाचा...
जिल्ह्यातील ओझर येथे मुंबई-आग्रा महामार्गाच्या विस्तारीकरणाचे अनेक दिवसांपासून सुरू आहे. यात बाणगंगा नदीवरील पुलाला समांतर दोन्ही बाजूंनी सर्व्हिस रोडचे काम सुरू आहे. पूर्व बाजूकडील सर्व्हिस रोडच्या कामात माळी समाजाचे व मारवाडी समाजाचे मारुती मंदिर अडथळा ठरत होते. त्यामुळे माळी समाजाने व महामार्ग प्राधिकरणाच्या आर्थिक सहकार्याने बाणगंगा काठावरील पुरातन महादेव मंदिरा शेजारी लोकसहभातून मंदिराची उभारणी केली. परंतु मारवाडी समाजाचे मारुती मंदिर तसेच राहिले होते. नवीन मंदिराचे काम झाल्यावर व मंदिरातील मूर्तीची नवीन मंदिरात स्थापना झाल्यानंतरच जुने मंदिराचे बांधकाम काढावे असे ठरले आणि त्यानुसार ६ मार्चला भूमिपूजनही झाले. मात्र मंदिर बांधण्यापूर्वीच पुलाखालील जुन्या मंदिराची दक्षिण बाजूची भिंत फोडून चोरट्यांनी मंदिरातील मारुतीची मूर्ती चोरून नेली.
१५ बाय १५ आकाराचे मारवाडी समाजासाठी ठराव
महामार्ग प्राधिकरण व जिल्हा परिषद सदस्य यतीन कदम, सुकदेव चौरे, रमेश लढ्ढा, बाळासाहेब फुलदेवरे, रामेश्वर सारडा यांच्या मध्यस्थीने गट नं २४०० मधील मोकळ्या भूखंडामध्ये १५ बाय १५ आकाराचे मारवाडी समाजासाठी मारुती मंदिर अग्रवाल कंपनीने बांधून देण्याचा ठराव २८ फेब्रुवारीला संमत करण्यात आला.
या प्रकरणाची सखोल चौकशी व्हावी
मूर्तीची चोरी करण्याची प्रवृत्ती निंदनीय आहे. या मंदिरासाठी जागा देऊन त्याठिकाणी प्राधिकरणाकडून मंदिराचे कामही सुरू झालेले नाही. ठरल्याप्रमाणे मंदिराचे काम पूर्ण झाल्यानंतरच मूर्तीची प्राणप्रतिष्ठा करून जुने मंदिर पाडण्यात येणार होते. मात्र असे न होताच मंदिरातील मारुतीची मूर्ती मूळ जागेवर नसल्याने या प्रकरणाची सखोल चौकशी व्हावी.- रमेश लढ्ढा (ओझर)
फौजदारी कार्यवाही करण्यात येईल
नवीन मंदिराचे कोणतेही काम सुरू झालेले नसताना पुलाखालील जुन्या मंदिरातील मारुतीची मूर्ती चोरी गेली, याबाबत इन्फ्राकॉम प्राधिकरण विभागाचे ठेकेदार दिनेश अग्रवाल यांना लेखी खुलासा करण्याबाबत, पुलाचे काम बंद करण्याबाबत व खुलासा न केल्यास फौजदारी कार्यवाही करण्यात येईल, असे पत्र ग्रामपालिकेने दिले आहे.-यतीन कदम, जिल्हा परिषद सदस्य
पोलिस ठाण्यात ग्रामपालिकेतर्फे तक्रार दाखल
ऐरवी अनेकवेळा चोरटे मंदिराच्या दरवाज्याचा कडी कोयंडा तोडून तेथील दानपेटी चोरून नेत असतात मात्र ओझर येथे चोरट्यांनी मंदिरातून चक्क मारूतीची मूर्तीच चोरून नेली. याप्रकरणी ओझर पोलिस ठाण्यात ग्रामपालिकेतर्फे तक्रार दाखल करण्यात आली असून, या भागात महामार्गाचे काम करणाऱ्या इन्फ्राकॉम प्राधिकरण विभागाचे ठेकेदार अग्रवाल यांच्याकडेही खुलासा करण्याची मागणी केली आहे.
संपादन - ज्योती देवरे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.