मागणीअभावी मका कडबा शेतात पडून; शेतकरीवर्ग विल्हेवाटीच्या विवंचनेत

कंधाणे (नाशिक) : परिसरात व सर्वत्र झालेला मुबलक पाऊस आणि मोठ्या प्रमाणात घेतले जाणारे मकापीक व यांत्रिक पद्धतीने होणारी शेती यामुळे पाळीव प्राण्यांची संख्या कमी झाल्यामुळे शेकडो एकर क्षेत्रातील मका कडबा मागणी नसल्याने शेतातच पडला असून, परिसरातील शेतकरीवर्ग त्याच्या विल्हेवाटीच्या विवंचनेत आहेत. 

मागणी नसल्याने कडबा तसाच पडून

शेताच्या नांगरणी, पेरणी व इतर कामांसाठी दिवसेंदिवस नवनवीन तंत्रज्ञान व अवजारांचा शोध लागल्यामुळे शेतीची बहुतांश कामे यांत्रिक पद्धतीने होतात. पूर्वी शेतीला शेणखतासाठी शेतकऱ्यांकडे पाळीव प्राण्यांची संख्या अधिक होती; परंतु गुजरात व मुंबई येथून गोठ्यातील खताचा पुरवठा थेट शेतात होत असल्याने व शेतीच्या यांत्रिकीकरणामुळे बैलजोड्यांची संख्या कमी झाली असून, आता मोजक्याच शेतकऱ्यांकडे बैलजोडी आढळते. गायी, म्हशींसारखी दुभती जनावरे क्वचित आहेत. दर वर्षी कमी-अधिक प्रमाणात पाऊस किंवा दुष्काळी परिस्थितीत पशुपालकांकडून मोठ्या प्रमाणात मागणी होती; परंतु यंदा सर्वत्र समाधानकारक पाऊस झाल्याने मका सोंगणीला एक महिना होत आला तरी मागणी नसल्याने शेतातील कडबा तसाच पडून आहे. 

हेही वाचा >  धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ

तसेच उन्हाळ कांदा लागवडीसाठी मशागतीची कामे उरकण्यासाठी शेतातील कडबा फुकट घेऊन जाण्यासाठी परिसरातील शेतकरीवर्ग पशुपालकांना आवाहन करीत आहेत. कडब्याच्या मोबदल्यात मका पेरणी, कोळपणी व सरी पाडून देणे, मका सोंगणी करून कडबा आवरून घेणे अशी कामे होत आहेत. 

हेही वाचा > ह्रदयद्रावक! अखेरच्या क्षणीही मैत्रीचा घट्ट हात कायम; जीवलग मित्रांच्या एकत्रच निघाल्या अंत्ययात्रा