महापालिका अधिकाऱ्यांची पत्रकाराला मारहाण; पोलिस ठाण्यात गुन्हा दाखल 

सिडको (नाशिक) : महापालिका कर्मचारी-अधिकाऱ्यांच्या सुरू असलेल्या धिंगाण्याचे छायाचित्र काढणाऱ्या सिडकोतील पत्रकारास बेदम मारहाण करत शिवीगाळ करणाऱ्याविरोधात अंबड पोलिस ठाण्यात गुन्हा दाखल झाला. सहाय्यक पोलिस आयुक्त अशोक नखाते पुढील तपास करीत आहे.

मद्यपान करताना काढले फोटो

पत्रकार निशिकांत पाटील बुधवारी (ता.१३) रात्री पाथर्डी फाट्याहून अंबडकडे जात होते. या वेळी पाथर्डी फाट्याजवळील महापालिकेच्या पाण्याच्या टाकीजवळ गोंधळ सुरू असल्याचे दिसून आले. ते पाहण्यासाठी पत्रकार पाटील गेले असता त्यांना महापालिकेचे पाणीपुरवठा विभागाचे शैलेश झिटे, ललित भावसार यांच्यासह अन्य दोघे मद्यपान करीत असल्याचे दिसून आले. या वेळी पाटील यांनी त्यांचे छायाचित्र काढण्याचा प्रयत्न केला असता, त्यांना शिवीगाळ व दमदाटी करून लाथ्याबुक्यांनी मारहाण केली. हा प्रकार घडल्यानंतर पाटील यांनी अंबड पोलिस ठाण्यात तक्रार दिली.

हेही वाचा > तरुणाकडून धक्कादायक वस्तू सापडताच पोलीसही हैराण! युवावर्गाला सहज मिळणाऱ्या गोष्टीचा लावणार शोध?

तीन जणांना अटक, एकजण फरारी  

पोलिसांनी या प्रकरणी गुन्हा दाखल करून शैलेश रमेश झिटे (४२, रा. सिडको), अक्षय दीपक निकम (२४, अश्विननगर), ज्ञानेश्वर सखाराम शिंदे (३८, पाथर्डी फाटा) यांना अटक केली. कनिष्ठ अभियंता ललित भावसार यांचा पोलिस शोध घेत आहे. यासंदर्भात तीन जणांना अटक केली असून, एकजण फरारी आहे.

हेही वाचा > एकच व्यवहार आणि जर्मनीला उच्च शिक्षण घेण्याचे तरुणाचे स्वप्न क्षणार्धात भंगले!