कोरोनाची भीती झुगारुन दाखविली हिंमत...अन् 'ते' झाले मालामाल...नेमके काय घडले?

नाशिक : (चांदवड) 'सकाळ'ने संभ्रम दूर केला अन् कोरोनाची भीती झुगारून हिंमत करून शेतकऱ्यांनी टोमॅटोची लागवड केली. आज त्याच शेतकऱ्यांना टोमॅटोच्या लालीने मालामाल केल्याचे चित्र आहे. 

टोमॅटो लागवडीचा हंगाम

जून महिना म्हणजे नाशिक जिल्ह्याचा टोमॅटो लागवडीचा हंगाम. याच काळात देशभरात कोरोनाचा मोठ्या प्रमाणात  शिरकाव झालेला. शेतकरीवर्गात टोमॅटो लागवड केली तर टोमॅटो विकेल काय? पिंपळगाव बाजार समितीत व्यापारी येणार नाहीत, यांसह अनेक बाबतीत टोमॅटो लागवडीबाबत संभ्रम होता. याचवेळी 'सकाळ'ने 'टोमॅटो लागवडीचा रंग फिका' या मथळ्याखाली वृत्त प्रकाशित केले होते. यामध्ये पिंपळगाव बाजार समितीचे सभापती आमदार दिलीप बनकर व सह्याद्री फार्मर प्रोड्यूसर कंपनीचे अध्यक्ष विलास शिंदे यांच्या प्रतिक्रिया होत्या. या दोघांनीही, शेतकऱ्यांनी घाबरून जाऊ नये. 

लागवडीबाबतचा संभ्रम दूर होण्यास मदत 

शेतकऱ्यांनी दर वर्षीप्रमाणे यंदाही टोमॅटोलागवड करावी. बाजार समितीने पूर्ण नियोजन केले आहे. टोमॅटोला मागणी राहणार असल्याचे सांगितले होते. यामुळे बहुतांश टोमॅटो उत्पादकांमधील संभ्रम दूर होण्यास मदत झाली अन् शेतकऱ्यांनी टोमॅटोलागवड केली. आज याच शेतकऱ्यांनी लागवड केलेला टोमॅटो बाजारात दाखल झाला आहे. त्यांच्या टोमॅटोला चांगला भाव मिळत आहे. तरीही दर वर्षीच्या तुलनेत यंदा टोमॅटोची लागवड तीस टक्के कमी असल्याचे जाणकारांचे मत आहे. मागणीच्या तुलनेत पुरवठा कमीच राहणार असल्याने साधारणपणे डिसेंबरपर्यंत टोमॅटोचे दर टिकून राहतील, अशी अपेक्षा आहे. 

'टोमॅटो'ची आजची स्थिती 

लागवड अदांजे : साठ हजार एकर 
जिल्ह्यातील आवक : पन्नास हजार क्रेट्स 
मिळणारा दर : सरासरी साडेचारशे रुपये 
मागणी : फक्त जिल्ह्यातील प्रोसेसिंग युनिटला दररोज एक लाख क्रेट्स 

हेही वाचा > धाबे दणाणले! नियुक्ती होऊनही उमेदवार कामावर नाही?कारवाई तर होणारच

जूनमध्ये सर्वांत पहिले 'सकाळ'ने टोमॅटो उत्पादक शेतकऱ्यांचा संभ्रम दूर केला. त्यानंतर आम्हीही शेतकऱ्यांना प्रोत्साहित केले म्हणूनच आज शेतकऱ्यांना चांगले दर मिळून फायदा होतो आहे. शेतकऱ्यांनी बाजार समितीत टोमॅटो विक्रीसाठी काही अडचण असल्यास थेट संपर्क साधावा. - दिलीप बनकर, आमदार, सभापती (पिंपळगाव बाजार समिती) 

देशांतर्गत व देशाबाहेर टोमॅटोला मागणी चांगली आहे. त्यामुळे डिसेंबरपर्यंत दर चांगले राहतील. अजूनही अधिकाधिक शेतकऱ्यांनी टोमॅटो लागवडीकडे वळायला हवे. - विलास शिंदे, अध्यक्ष, सह्याद्री फार्मर प्रोड्यूसर कंपनी 

आम्ही दर वर्षी टोमॅटोलागवड करतो. यंदा कोरोनामुळे आम्ही टोमॅटो लावणार नव्हतो. ‘सकाळ’मधील बातमी वाचल्यानंतर टोमॅटोलागवड केली. आज आम्हाला फायदा होतो आहे. - गोरखनाथ रामभाऊ सोनवणे, प्रगतिशील शेतकरी, निमोण  

हेही वाचा > दुर्दैवी! बैलपोळ्याच्या पूर्वसंध्येला अचानक आलेल्या 'त्या' बातमीने ममदापूर हळहळले..काय घडले नेमके?

(संपादन - किशोरी वाघ)