चिंताजनक! जिल्ह्याला कोरोनाची मगरमिठी...बळींची संख्या साडेतीनशेच्या उंबरठ्यावर

नाशिक : जिल्हाभरातील ११७ कोरोनाबाधितांना मंगळवारी (ता. १४) डिस्चार्ज देण्यात आला. त्याचवेळी दिवसभरात आणखी १८५ जणांचे कोरोना अहवाल पॉझिटिव्ह आले आहेत. त्यात तब्बल १७४ रुग्ण हे नाशिक शहरातील आहेत. तर, दिवसभरात शहरातील सहा रुग्णांसह एकूण आठ जणांचा उपचार सुरू असताना मृत्यू झाला. त्यामुळे जिल्ह्यातील कोरोनाबळींची संख्या ३४९ झाली आहे. तर, कोरोनाबाधितांची संख्या सात हजार ४४४ आहे. 

दिवसभरात १८५ अहवाल पॉझिटिव्ह

शहरातील नाशिक रोड, जेल रोड आणि पंचवटी परिसर सध्या कोरोनाचे नवीन हॉटस्पॉट ठरत असून, मंगळवारच्या पॉझिटिव्ह अहवालांमधील बहुतांश रुग्ण हे याच भागातील आहेत. दुसरीकडे जिल्ह्यातील विविध रुग्णालयांत दिवसभरात ६५८ संशयित रुग्ण नव्याने दाखल झाले आहेत. यापैकी ३६० जण नाशिक शहरातील, २५७ ग्रामीण भागातील, तर मालेगाव महापालिका हद्दीतील १५ रुग्ण आहेत. त्याचप्रमाणे, कोरोनाबाधितांच्या संख्येबरोबरच प्रलंबित अहवालांचीही संख्या वाढत आहे. तर, मंगळवारी आठ रुग्णांचा उपचारादरम्यान मृत्यू झाला आहे. यात पंचवटी परिसरातील ७८ वर्षीय पुरुष, पाटीलनगर येथील ६३ वर्षीय पुरुष, जुने नाशिक परिसरातील ७२ वर्षीय वृद्ध, नारायण बापूनगर येथील ६३ वर्षीय पुरुष, जेल रोड येथील ५४ वर्षीय पुरुष, चेहेडी येथील ४० वर्षीय पुरुष.

हेही वाचा > रात्रीची वेळ..भयानक अंधार..शिक्षक चेकपोस्टवर ड्युटीवर असतानाच निघाला ६ फुटी कोब्रा!

तसेच ग्रामीण भागात नांदूर गावातील ३८ वर्षीय महिला, मुल्हेर (ता. बागलाण) येथील ८२ वर्षीय पुरुषाचाही उपचार सुरू असताना मृत्यू झाला. आतापर्यंत शहरात १८१, ग्रामीण भागात ७५, तर मालेगाव महापालिका हद्दीत ७९ रुग्णांचा कोरोनामुळे मृत्यू झाला आहे. तर, बरे झालेल्या रुग्णांची संख्या चार हजार ९६६ आहे. सद्यःस्थितीत दोन हजारांहून अधिक रुग्ण उपचार घेत आहेत.  

हेही वाचा > नाशिक दत्तक घेणारे कुठे गेले?...शिवसेनेचा सवाल