रानभाज्या विकून मिळते अर्धी भाकरी, मग मोबाईल कुठून आणणार? आदिवासी मुलांच्या ऑनलाईन शिक्षणाची व्यथा

नाशिक/अस्वली स्टेशन : देशभरात गेल्या चार ते पाच महिण्यांपासून कोरोनाच्या वाढत्या प्रादुर्भावामुळे शाळा, महाविद्यालये बंद करण्यात आली असल्यामुळे शासन विद्यार्थ्यांना ऑनलाईन प्रणालीनुसार शिक्षण देत आहेत. मात्र ग्रामीण भागातील वाड्या वस्त्यांवर राहणाऱ्या आदिवासी कुटुंबांना उदरनिर्वाहाच्या एक वेळेच्या जेवणाची भ्रात तेव्हा मुलांच्या शिक्षणासाठी एवढा महाग भ्रमणध्वनी घेणे परवडणारे नसल्यामुळे ही मुले रोजचा खर्च भागविण्यासाठी रानावनात फिरुन रानभाज्या विकण्याचे काम करीत आहे. 

साधने कुठुन येणार?

कोरोना विषाणूच्या प्रादुर्भावामुळे जिल्ह्यातील शाळा, महाविद्यालये बंद करण्यात आली असून ऑनलाईन शिक्षण प्रणाली सुरू करण्यात आली आहे. आदिवासी तालुका म्हणून ओळख असलेल्या इगतपुरी तालुक्यातील आदिवासी ग्रामीण भागातील विदयार्थी शाळा बंद असल्यामुळे वेगवेगळ्या प्रकारच्या कामांतून कुटुंबाला आर्थिक आधार देत आहेत. तालुक्यातील काही भागात अनेक गाव-पाड्यातील आदिवासी मुलांकडे एवढे महाग अँड्रॉइड मोबाईल घेण्याची ऐपत नाही, तसेच मोबाईलचे इंटरनेट सुविधाही उपलब्ध नाही. अशा परिस्थितीत ग्रामीण व दुर्गम भागातील विद्यार्थ्यांकडे लॅपटॉप, टॅब तसेच अँड्रॉइड मोबाईल यासारखी आधुनिक साधने कुठुन येणार? यामुळे यंदा ग्रामीण भागातील विदयार्थी शिक्षणापासून वंचित राहणार असल्याचे चित्र स्पष्ट दिसत आहे.

हेही वाचा > गंभीर! १५ वर्षीय मुलीची बापा विरोधात तक्रार; वेळीच वाचा फोडली म्हणून प्रकार उजेडात

विद्यार्थ्यांचे शैक्षणिक नुकसान

इगतपुरी तालुक्यातील काही आदिवासी भागातील मुले कुटुंबाला आर्थिक आधार देत रस्त्यावर रानभाज्या विकण्याचे काम करत असल्याचे दिसत आहे. यामुळे या विद्यार्थ्यांचे शैक्षणिक नुकसान होण्याची भीती पालकांकडून व्यक्त होत आहे. यामध्ये काही शिक्षक आॅनलाईन शिक्षण उपक्रमासाठी वाड्या वस्त्यावर फिरून विदयार्थी व पालकांचे प्रबोधन करत आहेत. यामुळे विद्यार्थी व पालकांच्या नजरा शाळा सुरु होण्याकडे लागल्या आहेत. 

हेही वाचा > एकीकडे गौराईनिमित्त स्त्रीशक्तीचा जागर; दुसरीकडे 'ती'च नकोशी? चिमुरड्या जीवाला शिक्षा कशासाठी?

कोरोनाच्या वाढत्या प्रादुर्भावामुळे तालुक्यातील जिल्हा परिषद आणि इतर शाळा बंद असल्याने ग्रामीण भागातील विदयार्थी रस्त्यावर रानभाज्या विकताय. विद्यार्थी शैक्षणिक प्रवाहापासून दूर जातांना दिसत आहे. ऑनलाइन शिक्षण प्रणाली ग्रामीण भागात कुचकामी ठरत असून काही शिक्षक स्वयंस्फूर्तीने घरोघरी जाऊन अभ्यास घेत आहे. तसेच पोषण आहार बंद असल्याने कुपोषण वाढण्याची शक्यता नाकारता येत नाही. ग्रामीण भागातील नागरिकांकडे रोजगाराच्या संधी नाहीत." - सोमनाथ जोशी.सदस्य, पंचायत समिती इगतपुरी.

संपादन - रोहित कणसे