कैद्यांचे वेतन वाढले! लॉकडाउनमध्ये मिळवून दिला मोठा महसूल; स्वतःचीही चांगली कमाई

सकाळ वृत्तसेवा
Friday, 9 October 2020

नाशिकरोडच्या मध्यवर्ती कारागृहातील कैद्यांनी लॉकडाउनमध्ये तब्बल एक लाख मास्क तयार करून मोठा महसूल तर दिलाच, शिवाय वेतनातून स्वतःही चांगली कमाई केली. कारागृह अधीक्षक प्रमोद वाघ, कारखाना व्यवस्थापक पल्लवी कदम यांनी ही माहिती दिली.

नाशिक : नाशिकरोड कारागृहात सुतार, लोहार, मूर्ती, वीणकाम, बेकरी, रसायन आदी नऊ कारखाने आहेत. त्यातून दरवर्षी सहा कोटींवर महसूल मिळतो. फक्त शिक्षा झालेल्या कैद्यांनाच काम देता येते. त्यांना २० सप्टेंबरपासून वेतनवाढ लागू झाली आहे.

म्हणून शक्य झाले

देशातील अनेक कारागृहांमध्ये कोरोनाची लागण झाली. मुंबईच्या आर्थर रोड कारागृहात दीडशेवर कैद्यांना कोरोना झाला. मात्र, नाशिकरोड कारागृहात एकही कैदी अथवा कर्मचाऱ्याला कोरोना झालेला नाही. याचे प्रमुख कारण आरोग्यविषयक उपाययोजना तर आहेतच, परंतु कैद्यांना नियमित रोजगार पुरवून त्यांचे मानसिक आरोग्य चांगले ठेवण्यात आलेले यश हेदेखील आहे. अन्य कारागृहांत लॉकडाउनमुळे कच्चा माल न पोहोचल्याने त्यांचे कारखाने ठप्प होते. नाशिकरोड कारागृहाने योग्य नियोजन केल्याने येथील नऊ कारखाने सुरूच राहिले. त्यामुळे कैद्यांना चांगले वेतन, सरकारला महसूल, तर ग्राहकांना दर्जेदार वस्तू मिळाल्या.

कारागृहाला मिळाले पंधरा ते वीस लाख

नाशिकरोड कारागृहातील तीस कैद्यांनी लॉकडाउनमध्ये कॉटनचे किंमत १५ ते २० रुपये प्रति, एक लाख री-युजेबल मास्क तयार केले. जिल्हा रुग्णालय व संदर्भ रुग्णालय, महाराष्ट्र बँक, बडोदा बँक, राज्यातील सर्व कारागृहे, नाशिकरोड प्रेस, गणेश कंपनी, रेल्वे सुरक्षा बल, स्वयंसेवी संस्था, हौसिंग सोसायट्या आदींनी हजारो मास्क घेतले. त्यातून कारागृहाला पंधरा ते वीस लाख, तर यंदा गणेशमूर्ती विक्रीतून सव्वासात लाख रुपये मिळाले. कारागृहाने २०१८ मध्ये रेल्वेला ८० हजार कागदी पिशव्या तयार करून दिल्या.

हेही वाचा > विनानोंदणी ऑक्सिजन पुरवठ्यातून नाशिकच्या सात कंपन्याचे पितळ उघड; कंपन्यांवर नियंत्रण कुणाचे? 

२० सप्टेंबरपासून वेतनवाढ लागू 

नाशिकरोड कारागृहात सुतार, लोहार, मूर्ती, वीणकाम, बेकरी, रसायन आदी नऊ कारखाने आहेत. त्यातून दरवर्षी सहा कोटींवर महसूल मिळतो. फक्त शिक्षा झालेल्या कैद्यांनाच काम देता येते. त्यांना २० सप्टेंबरपासून वेतनवाढ लागू झाली आहे. कुशल कैद्यांना दिवसाला ६१ रुपये वेतन होते. ते आता ६७ रुपये झाले आहे. अर्धकुशल कैद्यांचे वेतन ५५ वरून ६१, तर अकुशल कैद्यांचे वेतन ४४ वरून ४९ रुपयांवर झाले आहे. हे वेतन कैदी घरी पाठवू शकतो, वकिलाची फी, कँटीनचा खर्च देऊ शकतो. काही रक्कम सुटकेच्या वेळी दिली जाते. 

हेही वाचा >  कैद्याची मास्कच्या नाडीने गळफास लावून आत्महत्या; नाशिक मध्यवर्ती कारागृहातील घटना


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Salary of inmates of Nashik Road Jail increased nashik marathi news