महानगरपालिकेच्या वीजबिलात साठ टक्के बचत होईल; स्मार्टसिटी कंपनीचा दावा

नाशिक : स्मार्टसिटी अंतर्गत महापालिकेच्या सात इमारतींवर सौरऊर्जा प्रकल्प कार्यान्वित झाला असून, यात ३६० किलोवॉट विजेचा वापर होत आहे. या माध्यमातून ऑक्टोबर २०१९ ते ऑक्टोबर २०२० या कालावधीत सौरऊर्जा वापरातून महापालिकेच्या वीजबिलात साठ टक्के बचत झाल्याचा दावा स्मार्टसिटी कंपनीने केला आहे. 

महिन्याकाठी दीड ते पावणदोन कोटी इतके वीजबिल

नागरिकांना सौरउर्जेचा वापर करण्यास उद्युक्त करण्याचा भाग म्हणून स्मार्टसिटी कंपनीमार्फत महापालिकेच्या इमारतींवर पीपीपी तत्त्वावर सौरऊर्जा प्रकल्प राबविला जात आहे. महापालिकेच्या सात इमारतींपैकी राजीव गांधी भवनावरील छतांवर २०७.२ किलोवॉट वीज, पंचवटी विभागीय कार्यालयात २५.१६ व ३१.४५ किलोवॉट वीज, जिजामाता हॉस्पिटल येथे १३.२ किलोवॉट, नाशिक रोड विभागीय कार्यालयाच्या छतावर ५२.८ किलोवॉट, शिंगाडा तलाव अग्निशमन केंद्राच्या छतावर १३.२ किलोवॉट, तर सिडको विभागीय कार्यालयाच्या छतावर १५.५४ किलोवॉट वीजनिर्मिती होत आहे. आणखी आठ ठिकाणी सौरऊर्जा प्रकल्प राबविण्याचे काम सुरू असून, पूर्ण क्षमतेने सौरऊर्जा निर्मिती सुरू झाल्यास महापालिकेला वार्षिक एक कोटीचा फायदा होणार आहे. सध्या महापालिकेला महिन्याकाठी जवळपास दीड ते पावणदोन कोटी रुपये इतके वीजबिल अदा करावे लागते. 

हेही वाचा > समाजकंटकाचेच षड्यंत्र! वाळलेले कांदारोप बघून शेतकऱ्याला धक्काच; अखेर संशय खरा ठरला

सातशे टन लाकडाची बचत 

नाशिक अमरधाममध्ये वीज शवदाहिनी बसविण्यात आली. दुसरी वीज शवदाहिनी बसविण्याचे काम सुरू आहे. नाशिक अमरधाममध्ये वीजदाहिनीत मृतदेह जाळल्याने ५ नोव्हेंबर २०२० पर्यंत ७०१.४२० टन लाकडाची बचत झाल्याचा दावा स्मार्टसिटी कंपनीने केला आहे.  

हेही वाचा > शेडनेट पंजाच्या सहाय्याने फाडून आत शिरण्यात बिबट्या अयशस्वी; तरीही डाव साधलाच