नाशिकमध्ये भाजपला खिंडार? अनेकजण शिवसेनेच्या संपर्कात; महानगरप्रमुख बडगुजर यांचा दावा

नाशिक : आगामी महापालिका निवडणुकीच्या पार्श्‍वभूमीवर शिवसेनेने संघटना बळकटीवर भर दिला असून, सलग दुसऱ्या दिवशी चार नवीन शाखांचे उद्‌घाटन महानगरप्रमुख सुधाकर बडगुजर यांच्या हस्ते करण्यात आले. भारतीय जनता पक्षाचे अनेकजण शिवसेनेच्या संपर्कात असल्याचा दावा त्यांनी या वेळी केला. 

बडगुजर म्हणाले, की शहरात शिवसेनेचा सुरू असलेला झंझावात बघता विरोधकांनी त्याचा धसका घेतला आहे. भाजपचे अनेकजण शिवसेनेच्या संपर्कात आहेत. त्यामुळे शिवसेनेला सध्या चांगले दिवस आहेत. राज्यात शिवसेनाप्रणीत महाविकास आघाडीचे सरकार सत्तेवर असल्याने जमेची बाजू असून, त्याचा लाभ उचलून शिवसेना कार्यकर्त्यांनी सरकारची कामे तळागाळातील जनतेपर्यंत पोचवावेत. महानगरप्रमुखपदाची सूत्रे हाती घेतल्यानंतर विविध बैठका घेतल्यानंतर पक्षाचा सर्व अंगीकृत संघटनांच्या पदाधिकारी व कार्यकर्त्यांमध्ये उत्साह संचारला आहे. त्यामुळे आगामी निवडणुका जिंकायाच्याच असा दृष्टिकोन डोळ्यांसमोर ठेवून कामाला लागण्याचे आवाहन त्यांनी केले. 

हेही वाचा - ह्रदयद्रावक! केवळ लेकरासाठीच मातेचे कष्ट अन् धडपड; नियतीचा घाला आला आणि सहा वर्षाचं लेकरू झालं पोरकं

शहरात शाखांचे उद्‌घाटन 

पंचवटी विभागातील पेठ रोडवरील मेहेरधाम बसस्टॉप, बोरगड चौफुलीवरील शिवतेजनगर, दिंडोरी रोडवरील कसांरामाता चौक, रिलायन्स चौफुली या शाखांचे उद्‌घाटन बडगुजर यांच्या हस्ते करण्यात आले. त्या वेळी ते बोलत होतेकार्यक्रमास विरोधी पक्षनेते अजय बोरस्ते, माजी महापौर विनायक पांडे, दत्ता गायकवाड, गटनेते विलास शिंदे, युवासेना जिल्हाप्रमुख दीपक दातीर, दिलीप मोरे, बाळासाहेब कोकणे, रुपेश पालकर, भारतीय विद्यार्थी सेनेचे जिल्हाध्यक्ष वैभव ठाकरे, महिला आघाडीच्या सत्यभामा गाडेकर, मंगला भास्कर, श्यामला दीक्षित, राजू लवटे, महानगर संघटक दिगंबर मोगरे, राहुल दराडे, विधानसभाप्रमुख नितीन चिडे, योगेश बेलदार आदी उपस्थित होते.

हेही वाचा - सरपंचपद भोगल्यानंतर भयाण वास्तवाचा सामना! माजी सरपंचांवर आज मजुरीची वेळ