'नाफेड'कडून ताहाराबाद अन्‌ नारायणगाव पाठोपाठ 'इथं' देखील कांदा खरेदी होणार सुरू!

नाशिक : यंदा उन्हाळ कांद्याचे अमाप पीक असल्याने केंद्रातर्फे "नाफेड'च्या माध्यमातून कांदा खरेदीचा निर्णय घेण्यात आला आहे. त्यानुसार बुधवार (ता. 29)पासून ताहाराबाद आणि नारायणगावमध्ये "नाफेड'तर्फे कांदा खरेदीला सुरवात झाली आहे. या गावमध्ये कांद्याची खरेदी येत्या एक ते दोन दिवसांत सुरू होईल. यंदा "नाफेड'तर्फे कांद्याच्या पट्ट्यात 40 हजार टन कांदा खरेदीचे उद्दिष्ट निश्‍चित करण्यात आले आहे. 

दर स्थिरावण्यासाठी मदत होण्याची आशा 

"नाफेड'तर्फे पुढील महिन्यापासून कांदा खरेदीची शक्‍यता वर्तविण्यात येत होती. मात्र, मजूर आणि गुदाम उपलब्धतेमुळे मुदतीपूर्वी खरेदीची प्रक्रिया सुरू झाली आहे. यापूर्वी लासलगाव, पिंपळगाव, कळवणमध्ये कांद्याची खरेदी "नाफेड'ने केली होती. आता मात्र मजूर आणि गुदाम उपलब्ध होईल अशा ठिकाणी कांद्याची खरेदी करण्याची तयारी "नाफेड'ने ठेवलेली आहे. बाजार समितीमध्ये असलेल्या भावाने "नाफेड' कांदा खरेदी करणार आहे. सद्यःस्थिती, लॉकडाउन आणि मजुरांच्या उपलब्धतेच्या प्रश्‍नामुळे दोन्ही ठिकाणी दिवसाला दहा ते वीस टन कांद्याची खरेदी होत आहे. लॉकडाउन आणि निर्यातीवर झालेला निम्म्याहून अधिक परिणाम या कारणांमुळे उन्हाळ कांद्याची आवक मोठ्या प्रमाणात सुरू झाली असली, तरीही त्यास अनेकदा उत्पादन खर्चापेक्षा कमी भाव मिळत असल्याने शेतकऱ्यांना नुकसानीला सामोरे जावे लागत आहे. अशातच, "नाफेड'ने कांदा खरेदी सुरू केल्याने दर स्थिरावण्यासाठी मदत होण्याची आशा शेतकऱ्यांना वाटू लागली आहे. 

सत्तर हजार टनांपर्यंत खरेदीची शक्‍यता 

केंद्रातर्फे एक लाख टन कांद्याच्या खरेदीचे उद्दिष्ट निश्‍चित करण्यात आले आहे. "नाफेड'तर्फे 70 हजार टनांपर्यंत कांद्याच्या खरेदीची शक्‍यता वर्तविण्यात येत आहे. यापूर्वी "नाफेड'ला 50 हजार टन कांदा खरेदीचे उद्दिष्ट देण्यात आले होते. प्रत्यक्षात 57 हजार टन कांद्याची खरेदी झाली होती. त्यात महाराष्ट्रातील 48 हजार आणि गुजरातमधील नऊ हजार टन कांद्याचा समावेश होता. तसेच 2018 मध्ये 25 हजार टन खरेदीचे उद्दिष्ट होते. मात्र 14 हजार टन खरेदी झाली होती. 

हेही वाचा > नियती झाली क्रूर! आई..'सगळं सुख तुझ्या पायाशी आणेल मी"...म्हणणारा मुलगा तिच्यासमोर प्राण सोडतो तेव्हा

भाड्याने गुदाम घेणार 

"नाफेड'ची लासलगावमध्ये चार हजार, तर पिंपळगावमध्ये तीन हजार अशी सात हजार टन साठवणूक क्षमता आहे. त्यामुळे कांदा साठविण्यासाठी लागणारी गुदामे, कांदाचाळी भाडेपट्ट्याने घेतल्या जाणार आहेत. यंदा महाराष्ट्र, गुजरात, मध्य प्रदेशमध्ये कांद्याची खरेदी केली जाणार असल्याची माहिती उपलब्ध झाली आहे.  

हेही वाचा > ह्रदयद्रावक! "करपलेल्या जखमी पायांनी लांब अंतर कापतोय खरं..पण घरात घेतील ना?"