भेंडी शिवारातून सव्वा लाखाच्या कांद्याची चोरी; गुन्हा दाखल

नाशिक/कळवण : तालुक्यात भेंडी शिवारात एक लाख २५ हजारांच्या २५ क्विंटल कांद्याची चोरी झाल्याची घटना मंगळवारी (ता.३) रात्री घडली.  या घटनेने कांदा उत्पादक शेतकऱ्यांच्या डोळ्यात अश्रू आणले. राजकुमार देवरे यांनी नवी बेज व भेंडी शिवारातील शेतातील चाळीत कांदा साठवणूक केली आहे. त्यातून चोरट्यांनी कांदा लंपास केला. सध्या जिल्ह्यात चोरट्यांनी आपला मोर्चा कांदा उत्पादक शेतकऱ्यांच्या चाळीकडे वळविल्याने परिसरात शेतकऱ्यांची झोप पळाली आहे.

देवरे यांच्या फिर्यादीवरून चोरट्यांविरोधात कळवण पोलिस ठाण्यात गुन्हा दाखल झाला. बुधवारी (ता. ४) सकाळी शेतातील सालदार रामदास माळी-निकम यांच्या निदर्शनास ही बाब आल्यानंतर त्यांनी ही बाब  देवरे यांना सांगितली. कांदाची चोरी झाल्यामुळे राजकुमार देवरे, मनोज देवरे, शरद देवरे, स्वप्नील भोसले यांनी देवळा, उमराणे, अभोणा, कनाशी बाजार समितीत शोध घेतला. याबाबत काहीच तपास लागला नाही. पोलिस निरीक्षक प्रमोद वाघ, पोलिस उपनिरीक्षक वाघमोडे, पोलिस कर्मचारी बोरसे, घरटे यांनी भेट देऊन कांदा चाळीची पाहणी करून पंचनामा केला. पिक-अप वाहनातून कांदाचोरी झाल्याचा पोलिसांचा कयास असून, वाहतूक मार्गावरून माहितगार व्यक्तीकडून ही चोरी झाल्याचा अंदाज आहे. 
 

हेही वाचा > धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ