कोरोनाच्या काळात 'अनलॉक लर्निंग' मोहेमेत 'या' मुलींचं मोलाचं सहकार्य; वाचा

 नाशिक/वणी : कोरोनाच्या पार्श्वभूमीवर लॉकडाऊन सुरु असल्याने आश्रमशाळेतील तसेच वसतिगृहातील विद्यार्थी त्यांच्या मूळ गावी आपल्या घरी आहेत. दरम्यान नवे शैक्षणिक वर्ष सुरु झाले असून या काळात आदिवासी विद्यार्थी आपल्या घरी असले तरी विद्यार्थ्यांना ऑफलाईन व ऑनलाईन या दोन्हीच्या माध्यमातून शिक्षण देणारा 'अनलॉक लर्निंग' हा अभिनव उपक्रम महाराष्ट्र शासनाच्या आदिवासी विकास विभागाकडून राबवण्यात येत आहे.

विद्यार्थीनींच मोलाचं सहकार्य

 'अनलॉक लर्निंग' मोहिमेत नाशिक प्रकल्पातील वणी येथील आदिवासी मुलींचे शासकीय वसतिगृहातील विद्यार्थीनी मोलाचं सहकार्य करत आहेत. या मुली आपआपल्या गावातील प्राथमिक व माध्यमिक शाळेत शिकणाऱ्या विद्यार्थ्यांना ऑनलाईन व ऑफलाईन शिक्षणाचे धडे देत आहेत त्यामुळे कोरोनाच्या काळात शाळा बंद असल्याने विद्यार्थ्यांना शिक्षण मिळत आहे.  या शैक्षणीक उपक्रमासाठी आदिवासी विकास विभागाच्या वसतिगृहातील विद्यार्थी व विद्यार्थिनींचे देखील पुढे आले आहेत. नाशिक  प्रकल्पातील आदिवासी मुलींचे शासकीय वसतिगृहच्या विद्यार्थिनी देखील 'अनलॉक लर्निंग'  या उपक्रमात मोठ्या उत्साहाने सहभागी होत आहेत. 

हेही वाचा > ह्रदयद्रावक! मोबाईल मिळेना म्हणून भितीपोटी विद्यार्थीनीची आत्महत्या; ऑनलाइन शिक्षणाचा आणखी एक बळी

विद्यार्थिनींनी उत्स्फूर्त  प्रतिसाद

अनलॉक लर्निंग या उपक्रमांतर्गत एकात्मिक आदिवासी विकास प्रकल्प कार्यालय नाशिक  येथील श्री केतन पवार, सहाय्यक प्रकल्प अधिकारी (शिक्षण) यांच्या सूचनेनुसार नाशिक जिल्ह्यातील आदिवासी मुलींचे शासकीय वसतिगृह वणी ता दिंडोरी येथील गृहपाल तृप्ती बैरागी यांनी आपल्या वसतिगृहातील विद्यार्थिनींना या उपक्रमात सहभागी होण्याविषयी आवाहन केले. विद्यार्थिनींशी मोबाईल फोन तसेच गुगल मीट द्वार संवाद साधला, त्यांची प्रकृतीविषयक चौकशी करून अनलॉक लर्निंगबाबत महिती दिली. गृहपालांच्या या आवाहनाला विद्यार्थिनींनी देखील उत्स्फूर्त  प्रतिसाद दिला.

पाड्यावरील-गावातील आदिवासी विद्यार्थ्यांना ज्ञानदान

वसतिगृहाची विद्यार्थिनी पुष्पा गायकवाड या विद्यार्थिनीने सर्व प्रथम सुरुवात करून इतर विद्यार्थीनींनी शेवंता भरसट, हर्षाली भरसट, शेवंता जोपळे, कविता बागुल, द्रौपदी राउत, सरला चव्हाण या विद्यार्थिनी  सध्या आपल्या पाड्यावरील-गावातील आदिवासी विद्यार्थ्यांना ज्ञानदानाचे कार्य करत आहेत.  तसेच स्वतःचाही अभ्यास करत आहेत. आपल्या गावातील विद्यार्थ्याना वाचन घेणे, प्रार्थना शिकवणे, पाढे पाठ करून घेणे  इंग्रजी मुळाक्षरे शिकवणे, गणिते सोडवण्यास मदत करणे या प्रकारे मार्गदर्शन करत आहेत. आदिवासी मुलींचे शासकीय वसतिगृह वणी येथील गृहपाल तृप्ती बैरागी  या प्रत्येक आपल्या वसतिगृहातील विद्यार्थिनींशी व्हॉट्स ऍप द्वारे संवाद साधून त्यांना उपयुक्त मार्गदर्शन करत आहेत.

हेही वाचा > संतापजनक! कोरोनाबाधित महिलेचा सफाई कर्मचाऱ्याकडून विनयभंग; घटनेनंतर रुग्णालयात खळबळ

संपादन - रोहित कणसे