नाशिक : (नामपूर) कोरोनाच्या प्रादुर्भावामुळे ग्रामीण भागात अत्यंत भीतीदायक वातावरण असून, माणुसकीचा पाझर आटत असल्याची घटना बहिराणे (ता. बागलाण) येथे शुक्रवारी (ता.४) घडली. कोरोनाने मृत्यू तर झाला परंतू, मरणानंतरही त्यांच्या मरणयातना काही संपल्या नाही. वाचा सविस्तर...
अशी आहे घटना
७२ वर्षीय कोरोना पॉझिटिव्ह मृत रुग्णाच्या अंत्यसंस्कारांसाठी गावात वाहन उपलब्ध न झाल्याने शेजारील गावातून ट्रॅक्टर आणून अखेरचा प्रवास पूर्ण करावा लागला. शिवाय अंत्यविधीसाठीही जागा मिळत नसल्याने कुटुंबीयांना मृत्यूचे दुःख बाजूला सारून प्रचंड मानसिक त्रासाला सामोरे जावे लागले. बहिराणे येथील वृद्धाची कोरोना चाचणी पॉझिटिव्ह आली होती. त्यानंतर शुक्रवारी (ता.४) त्यांचे निधन झाल्याने गावात अंत्यसंस्कार करण्यास ग्रामस्थांनी विरोध केल्याने मृतदेहाची हेळसांड झाल्याचे कुटुंबीयांनी सांगितले. सुरुवातीला शेतात अंत्यसंस्कार करायचे होते. परंतु परिसरातील आदिवासी बांधवांनी आक्षेप घेतल्याने एका मोकळ्या जागेत अंत्यसंस्कारा साठी एका शेतकऱ्याने विरोध केला.
दु:खात असलेल्या कुटुंबीयांचा आक्रमक पवित्रा
मृतदेह पुन्हा बहिराणे येथील स्मशानभूमीत आणला. तेथेही ग्रामस्थांनी विरोध केल्याने त्यांच्या कुटुंबीयांना अनेक अडचणींचा सामना करावा लागला. अंत्यसंस्काराला होणारा विरोध बघता दु:खात असलेल्या कुटुंबीयांनी आक्रमक पवित्रा घेतला. यानंतर ग्रामस्थांनी एक पाऊल मागे घेतले. कोरोनाच्या दहशतीमुळे ग्रामीण भागातील विदारक चित्र अनुभवायला मिळाले. आरोग्य विभाग, स्थानिक प्रशासन यांनी दिरंगाई केल्याचा आरोप कोरोनाग्रस्त वृद्धाच्या कुटुंबीयांनी केला.
ग्रामीण भागात कोरोनाचे भीतिदायक वातावरण असल्याने ग्रामस्थांनी अंत्यसंस्कारास विरोध केला. याबाबत आरोग्य व महसूल विभागाच्या अधिकाऱ्यांना फोनद्वारे माहिती दिली. त्यांच्या कुटुंबातील नऊ जणांना अजमीर सौंदाणे येथे स्वॅब देण्यासाठी पाठविले आहे. कोरोनाग्रस्त रुग्णाच्या निधनामुळे काही दिवस गावातील व्यवहार बंद राहतील. - साहेबराव धोंडगे, सरपंच, बहिराणे
संपादन - किशोरी वाघ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.